म. टा. प्रतिनिधी, पुणे
राफेल विमान खरेदी प्रकरणी मोदी सरकारने केलेल्या भ्रष्टाचाराची संयुक्त संसदीय समितीमार्फत चौकशी करावी, अशी मागणी करत पुणे शहर जिल्हा काँग्रेस कमिटीने बुधवारी जिल्हाधिकारी कार्यालयासमोर धरणे आंदोलन केले. या वेळी काँग्रेस कार्यकर्त्यांनी केंद्र सरकारविरोधात जोरदार घोषणाबाजी केली.
राफेल प्रकरणाच्या चौकशीची मागणी करणारी याचिका सर्वोच्च न्यायालयाने फेटाळल्यानंतर भारतीय जनता पक्षाने देशभरात पत्रकार परिषदा घेऊन केंद्र सरकारला क्लीन चीट मिळाल्याचा दावा केला होता. त्याला प्रत्युत्तर म्हणून काँग्रेसनेही या प्रकरणी देशभरात आंदोलन छेडले आहे. त्या अंतर्गत शहर काँग्रेसने जिल्हाधिकारी कार्यालयासमोर आंदोलन करण्यात आले. या प्रसंगी शहराध्यक्ष रमेश बागवे, माजी आमदार मोहन जोशी, प्रदेश सरचिटणीस अॅड. अभय छाजेड, काँग्रेसचे पालिकेतील गटनेते अरविंद शिंदे, नगरसेवक आबा बागूल, अविनाश बागवे, सुजाता शेट्टी, लता राजगुरू, चाँदबी नदाफ, अजित दरेकर, रवींद्र धंगेकर, नीता रजपूत यांच्यासह पक्षाचे पदाधिकारी, कार्यकर्ते उपस्थित होते. मोदी सरकारने राफेल खरेदी प्रकरणात सर्वांत मोठा भ्रष्टाचार केला आहे, तसेच खोटे प्रतिज्ञापत्र सर्वोच्च न्यायालयात सादर केले आहे. त्यामुळे या प्रकरणाची संयुक्त संसदीय समितीतर्फे चौकशी करावी, अशा मागणीचे निवेदन काँग्रेसतर्फे जिल्हाधिकारी कार्याालयाला देण्यात आले.