प्रतिबंधित क्षेत्रांबाबत पोलिस आणि पालिका प्रशासनाचे दुमत
म. टा. प्रतिनिधी, पुणे
महापालिका आयुक्त शेखर गायकवाड यांनी जाहीर केलेले प्रतिबंधित क्षेत्र पोलिसांना मान्य नसल्याचा प्रकार सातत्याने दिसून येत आहे. त्यामुळे जाहीर केलेल्या प्रतिबंधित क्षेत्रांव्यतिरिक्त इतर ठिकाणची दुकाने पोलिसांकडून नियोजित वेळेपूर्वीच बंद करण्यात येत असल्याने नागरिकांमध्ये संभ्रम निर्माण झाला आहे. काही व्यापारी संघटनांनाही काही 'अदृश्य शक्ती' दुकाने उघडण्यास मनाई करत असल्याचे सांगण्यात येत आहे. त्यामुळे पोलिस ठाण्यांनीच आता दुकाने किती वाजता उघडणार आणि किती वाजता बंद होणार हे स्पष्ट करावे, अशी मागणी होत आहे.
पुण्यात पोलिस, महापालिका आणि जिल्हा प्रशासनातील असलेल्या समन्वयाच्या अभावाची दखल घेऊन उपमुख्यमंत्री अजित पवार यांनी संबंधितांशी चर्चा करून सूचना दिल्या होत्या. खासदार सुप्रिया सुळे यांनीही यामध्ये लक्ष घातल्याने राज्याचे मुख्य सचिव अजोय मेहता यांनी स्वतंत्र आदेश काढून महापालिका आयुक्त आणि जिल्हाधिकारी यांचे आदेश अंतिम राहतील आणि यंत्रणांनी त्यांना सहकार्य करण्याची भूमिका घ्यावी, असे स्पष्ट आदेश दिले आहेत. असे असतानाही पुण्यातील गोंधळ अद्यापही कायम असून प्रतिबंधीत क्षेत्रांव्यतिरिक्त इतर ठिकाणची दुकाने दुपारी बारा वाजता बंद होणे, काही ठिकाणच्या व्यापारी संघटनांकडून दुकाने उघडण्यास असमर्थता दर्शविणे, असे प्रकार घडत आहे. एक प्रकारे नागरिकांना वेठीस धरण्याचे हे प्रकार असून संबंधितांवर आपत्ती व्यवस्थापन कायद्यानुसार कारवाई करावी, अशी मागणी करण्यात येत आहे.
\B
राजकीय नेत्यांची 'मौनसाधना' \B
महापालिका आयुक्त शेखर गायकवाड यांनी प्रतिबंधित क्षेत्र वगळता इतर ठिकाणची दुकाने सकाळी सात ते सायंकाळी सात या वेळेत उघडण्यास परवानगी दिली आहे. मात्र, असे असतानाही अनेक ठिकाणी पोलिसांकडून सकाळी दहा ते बारा या वेळेतच उघडण्यासाठी दबाव आणण्यात येत आहे. ही दुकाने प्रतिबंधित क्षेत्रांमध्ये असल्याचा दावा त्यांच्याकडून करण्यात येतो. मात्र, प्रत्यक्षात महापालिका आयुक्तांनी काढलेल्या आदेशांमध्ये प्रतिबंधित क्षेत्रांव्यतिरिक्त असलेल्या ठिकाणी हे प्रकार सुरू असल्याचे चित्र दिसते आहे. याबाबत वरिष्ठ पोलिस अधिकाऱ्यांना विचारणा केली असता दुकाने बंद करण्यासाठीचे कुठलेही आदेश दिले नसल्याचे सांगण्यात येते. यावर स्थानिक लोकप्रतिनिधी, आमदार मात्र गप्प आहेत. पोलिसांना कोणीही विरोध दर्शविण्यास तयार नसल्याने नागरिकांमध्ये भीतीचे वातावरण पसरले आहे.
\B
स्थानिक पोलिसांच्या दबावाचे काय?
\Bमहापालिका आयुक्तांनी जाहीर केलेल्या प्रतिबंधित क्षेत्रांमध्ये शहरातील केवळ दहा चौरस किलोमीटरचा भूभाग येतो आहे. शहरातील ९७ टक्के क्षेत्र प्रतिबंधित क्षेत्रात येत नाही. करोनाचे ९३ टक्के रुग्ण प्रतिबंधित क्षेत्रांमध्ये येत असून, मुख्यत्वे हे रुग्ण पाच क्षेत्रीय कार्यालयांच्या हद्दीत येतात. महापालिका आयुक्त गायकवाड यांनी प्रतिबंधित क्षेत्र जाहीर केले असतानाही पोलिसांकडून शहरातील इतर भागांत दुकाने बंद करण्यासाठी आणण्यात येत असलेला दबाव स्थानिक पोलिसांच्या हेतूवर शंका उपस्थित करणारा ठरत आहे. मात्र, काही भागांत मद्यविक्रीच्या दुकानांबाबत वेगळी वागणूक मिळत असल्याने असल्यामागे काय 'गणिते' असावीत, असा प्रश्न विचारण्यात येत आहे.
\B
छोटे व्यावसायिक अडचणीत
\Bव्यापारी संघटनांनी १७ मेपर्यंत आपले व्यवसाय सुरू न करण्याचा निर्णय घेतल्याचे मेसेज व्हायरल झाले आहेत. त्याच वेळी शहरातील व्यवसाय टप्प्याटप्प्याने सुरू करण्यासाठी जिल्हा आणि महापालिका प्रशासन प्रयत्न करत आहे. राज्य सरकारकडूनही त्याच प्रकारच्या सूचना आहेत. मोठ्या व्यावसायिकांची दुकाने उघडण्यास परवानगी देण्यात आलेली नाहीत. मात्र, या व्यावसायिकांकडून छोट्या व्यावसायिकांचीही दुकाने उघडू देण्यात येत नाही. त्यामुळे छोटे व्यावसायिक अडचणीत आले आहेत. महापालिका आयुक्त गायकवाड यांनी याबाबत व्यापारी संघटनांची बैठक घेऊन त्यांच्याशी चर्चा सुरू केली आहे.
................ \B
\B