म. टा. प्रतिनिधी, पुणे
'श्रीराम करुणालहरी' ही मैफल बालशिक्षण मंदिराच्या सभागृहामध्ये नुकतीच आयोजित करण्यात आली होती. ज्येष्ठ गायक पं. सुहास व्यास यांच्या पुढाकाराने आयोजित केलेल्या या कार्यक्रमात गायनाचार्य पं. रामकृष्णबुवा वझे यांच्या अजोड कलाकृतींचा आस्वाद रसिकांनी घेतला. ही काव्यमय संध्या अविस्मरणीय ठरली.
प्रसिद्ध संगीतकार मिलिंद गुणे यांनी अतिशय सुमधुर अशा संगीतबद्ध केलेल्या काव्याचे जयदीप वैद्य, वझेबुवांची खापर पणती श्रुती वझे, शर्वरी वैद्य व स्वतः पं. सुहास व्यास यांनी उत्तमप्रकारे सादरीकरण केले. विद्यावाचस्पती शंकर अभ्यंकर यांच्या ओघवत्या निरूपणाने कार्यक्रमाची रंगत वाढली. श्रीरामाच्या गजराने रसिक भारावून गेले. गायनाचार्य पं. रामकृष्णबुवा वझे हे भारतीय अभिजात संगीतामधील आदराने घेतले गेलेले नाव. त्यांच्या कार्याचे अनेक संदर्भ अभ्यंकर यांनी विस्तृतपणे सांगितले.
संत तुलसीदास यांच्या शिवस्तुतीने कार्यक्रमाची सुरुवात झाली. मिलिंद गुणे यांनी शिवस्तुती भैरव, अहिरभैरव, नटभैरव, शिवमत भैरव, भैरव बहार यामध्ये अतिशय सुंदर रीतीने गुंफण केली. हिंडोल या पं. सी. आर. व्यास रचित रागामध्ये केलेला 'श्रीराम'चा गजर अतिशय भावपूर्ण व कसदार झाला. करुणालहरी काव्य शार्दुलविक्रिडीत या वृत्तामध्ये असल्यामुळे एका विशिष्ट लयीचा आनंद घेता आला. दुसरा करुणालहरीचा भाग भुजंगप्रयास वृत्तामध्ये असल्यामुळे त्या लयीचा आनंद श्रोत्यांना मिळाला. अमर ओक (बासरी), अभिषेक बोरकर (सरोद), नीलेश रणदिवे (तबला), अमेय गाडगीळ (कीबोर्ड), गोविंद भिलारे (पखवाज), लीना केतकर (पढंत), आदित्य आपटे (तालवाद्य), रोहन वनगे (ऱ्हिदम), राहुल गोळे (ऑर्गन) व स्वाती गुणे (हार्मोनियम) यांनी उत्तम साथ केली. पं. सुहास व्यास यांच्या हस्ते कलाकारांचा सत्कार करण्यात आला. बुवांच्या नातसून व प्रसिद्ध सतारवादक लीनता वझे यांनी प्रास्ताविक केले. अरुण जोशी यांनी संयोजन केले.
--------