म. टा. प्रतिनिधी, पुणे
महाराष्ट्र राज्य माध्यमिक आणि उच्च माध्यमिक शिक्षण मंडळाद्वारे घेतलेल्या दहावीच्या परीक्षेत विशेष प्रवर्गातून उत्तीर्ण होणाऱ्यांचे प्रमाण ८६.८७ टक्के आहे. तर, डिस्लेक्सिया गटातून एक हजार ४७४ विद्यार्थी उत्तीर्ण झाले असून त्यांचे प्रमाण सर्वाधित ९३.८९ टक्के आहे. त्यामुळे या निकालात विशेष विद्यार्थ्यांनी चांगली कामगिरी केली असून सर्वच गटात उत्तीर्णांचे प्रमाण ८० टक्क्यांपेक्षा अधिक आहे.
विशेष प्रवर्गातून एकूण सात हजार ८३६ विद्यार्थ्यांनी परीक्षेसाठी नोंदणी केली होती. त्यापैकी सात हजार ८०५ विद्यार्थी परीक्षेला बसले होते. त्यातून सह हजार ७८० विद्यार्थी उत्तीर्ण झाले आहेत. ऑर्थो गटातून दोन हजार ४२८ विद्यार्थ्यांनी परीक्षा दिली होती. त्यातून २ हजार १०८ विद्यार्थी उत्तीर्ण झाले असून त्यांचे प्रमाण ८६. ८२ टक्के आहे. अंध प्रवर्गातून ८९४ विद्यार्थी परीक्षेला बसले होते, तर कर्णबधीर गटातून १ हजार ६७३ विद्यार्थ्यांनी परीक्षा दिली होती. त्यातून १ हजार ४०१ विद्यार्थी उत्तीर्ण झाले असून त्यांच्या उत्तीर्णांचे प्रमाण ८३.७४ टक्के आहे. मूकबधीर गटातून १७० विद्यार्थ्यांनी परीक्षा दिली होती. त्यातून १३६ विद्यार्थी उत्तीर्ण झाले असून त्यांच्या उत्तीर्णांचे प्रमाण ८० टक्के आहे. तर, स्पॅटिक्स गटातून १४२ विद्यार्थ्यांनी परीक्षा दिली होती. त्यातून १२७ विद्यार्थी उत्तीर्ण झाले असून त्यांचे प्रमाण ८९.४४ टक्के आहे. ऑटिझम गटातून ४४ विद्यार्थी परीक्षेला बसले होते. त्यापैकी ४१ विद्यार्थी उत्तीर्ण झाले असून त्यांचे प्रमाण ९३.१८ टक्के आहेत. सेरेब्रल पाल्सी गटातून १९६ विद्यार्थी परीक्षेला बसले होते. त्यातून १७२ विद्यार्थी उत्तीर्ण झाले असून त्यांचे प्रमाण ८७.७६ टक्के आहे. गतिमंद गटातून एकूण ७८५ विद्यार्थ्यांनी परीक्षा दिली होती. त्यातून ५८४ विद्यार्थी उत्तीर्ण झाले असून त्याचे प्रमाण ७४.३९ टक्के आहे.