म. टा. प्रतिनिधी, पुणे
राज्यात शिक्षक भरतीचा दुसरा टप्पा राबविण्यासाठी शिक्षण विभागाने पावले उचलली असून, खासगी शिक्षण संस्थांमध्ये इयत्ता नववी ते बारावीसाठी मुलाखतीसह आणि मुलाखतीशिवाय शिक्षक भरतीसाठीची प्रक्रिया 'पवित्र पोर्टल'वर जाहीर केली आहे. त्यानुसार शिक्षक भरतीसाठी इच्छुक उमेदवारांनी पोर्टलच्या सूचनांनुसार कार्यवाही करायची आहे.
या सूचनांनुसार उमेदवारांच्या श्रेणीची माहिती केवळ पदव्युत्तर पदवीमध्ये पूर्वीच्या निकषांपेक्षा कमी गुण असणाऱ्या उमेदवारांकडून मागविण्यात येत आहे. त्यामुळे अन्य उमेदवारांनी त्यांच्या श्रेणीची माहिती देण्याची आवश्यकता नाही. उमेदवारांनी पदव्युत्तर पदवीच्या विषयातील प्राप्त श्रेणीची माहिती भरल्यानंतर इयत्ता नववी ते बारावी या गटातील पात्र उमेदवारांना मुलाखतीसह व मुलाखतीशिवाय प्राधान्यक्रम दिले जातील. उमेदवारांनी दिलेल्या मुदतीत प्राधान्यक्रम लॉक करावेत. त्यापूर्वी, उमेदवारांनी अकरावी व बारावी गटासाठी श्रेणीची माहिती १६ ते २२ डिसेंबर कालावधीत द्यावी.
पवित्र प्रणालीअंतर्गत ९ ऑगस्टला नियुक्तीस शिफारसपात्र उमेदवारांची निवड यादी प्रसिद्ध झाली. त्यानंतर ऊर्दू माध्यमाच्या अनुसूचित जाती, अनुसूचित जमाती व अन्य प्रवर्गातील रिक्त पदे भरण्यासाठी उमेदवार उपलब्ध नसल्याने ही पदे खुल्या प्रवर्गातून भरण्यासाठी सरकारने परवानगी दिली आहे. समांतर आरक्षणासह शिल्लक राहिलेली आरक्षित पदे खुल्या प्रवर्गामध्ये समांतर आरक्षणासह दर्शविली आहेत. त्यामुळे खुला प्रवर्ग विचारात घेऊन पात्र उमेदवारांना प्राधान्यक्रम देण्यात येणार आहेत. यापूर्वीच्या निवड यादीमध्ये शिफारस न झालेल्या पात्र उमेदवारांना पुन्हा प्राधान्यक्रम भरणे आवश्यक आहे. त्याशिवाय उमेदवाराचा शिल्लक रिक्त पदावरील पदभरतीसाठी विचार केला जाणार नसल्याचे स्पष्ट करण्यात आले आहे. दरम्यान, यापूर्वी दिलेले प्राधान्यक्रम प्रथम निवड यादीसाठी विचारात घेतले आहेत. त्यामुळे यापूर्वीचे प्राधान्यक्रम विचारात घेऊन कार्यवाही पूर्ण झाली आहे. उर्वरित रिक्त पदे खुल्या प्रवर्गातून नव्याने भरण्यात येणार असल्यामुळे पात्र उमेदवारांकडून नव्याने प्राधान्यक्रम मागविले आहेत. सविस्तर माहिती पवित्र पोर्टलवर आहे.
.....
प्राधान्यक्रमाबाबत पोर्टलवर मिळेल माहिती
ऊर्दू माध्यमातील रिक्त पदे भरण्यासाठी पात्र उमेदवारांकडून प्राधान्यक्रम मागविण्यात येणार आहेत. या उमेदवारांना शैक्षणिक पात्रतेनुसार प्राधान्यक्रम उपलब्ध होतील. प्राधान्यक्रम भरण्याचा कालावधी पोर्टलवर कळविण्यात येईल. समांतर आरक्षण व प्रवर्गातील पदे विचारात घेऊन शिफारस पात्र उमेदवारांची पहिली निवड यादी प्रसिद्ध करण्यात येईल. त्यानंतर समांतर आरक्षणातील उमेदवार उपलब्ध न झाल्यामुळे, या आरक्षणातील रिक्त राहणारी पदे खुल्या प्रवर्गामध्ये रूपांतरित करून उर्वरित उमेदवारांना विचारात घेऊन स्वतंत्रपणे उमेदवारांची दुसरी निवडयादी प्रसिद्ध होईल.