नवीन इमारतीचे स्ट्रक्चर ऑडिट करणार

म. टा. प्रतिनिधी, पुणे

महापालिकेच्या विस्तारित इमारतीच्या छतामधून उद्घाटनाच्या दिवशीच झालेल्या पाण्याच्या गळती प्रकरणाची गंभीर दखल प्रशासनाने घेतली आहे. महापालिकेच्या नवीन इमारतीचे स्ट्रक्चरल ऑडिट शासकीय अभियांत्रिकी महाविद्यालयाच्या (सीओईपी) माध्यमातून करण्यात येईल,' अशी माहिती आयुक्त सौरभ राव यांनी मंगळवारी दिली.

गेल्या आठवड्यात पालिकेने ४९ कोटी रुपये खर्च करून पालिकेने उभारलेल्या विस्तारित इमारतीचे उद्घाटन उपराष्ट्रपती व्यंकय्या नायडू यांच्या हस्ते झाले. या कार्यक्रमाच्या वेळी झालेल्या जोरदार पावसाने नवीन इमारतीत पाण्याची गळती झाली. मंगळवारी झालेल्या स्थायी समितीच्या बैठकीत विरोधी पक्ष असलेल्या शिवसेनेच्या नगरसेविका संगीता ठोसर, राष्ट्रवादीचे दिलीप बराटे, लक्ष्मी दुधाने, काँग्रेसच्या वैशाली मराठे यांनी याबाबत प्रश्न उपस्थित करून प्रशासनाला जाब विचारला. यावर खुलासा करताना आयुक्त सौरभ राव म्हणाले, 'इमारत गळती प्रकरणाची प्रशासनाने गंभीर दखल घेतली आहे. या इमारतीचे 'सीओईपी'च्या माध्यमातून स्ट्रक्चरल ऑडिट करण्यात येणार आहे.'

नवीन इमारतीला कुलूप

उपराष्ट्रपती नायडू यांच्या हस्ते मोठा गाजावाजा करत उद्घाटन करण्यात आलेल्या पालिकेच्या विस्तारित इमारतीमध्ये कुणी जाऊ नये, यासाठी पालिका प्रशासनाने इमारतीच्या प्रवेशद्वाराला कुलूप ठोकले आहे. या नवीन इमारतीमध्ये प्रवेश करण्यासाठी सध्या असलेल्या पालिका भवनाच्या दुसऱ्या आणि तिसऱ्या मजल्यावरून पालिकेने प्रवेशद्वार तयार केले आहे. गेल्या आ‌ठवड्यापासून पालिकेत येणारे नागरिक, पालिकेतील पदाधिकारी या प्रवेशद्वारांचा वापर करून नवीन इमारतीत जात होते. मंगळवारी या दोन्ही मजल्यावरील प्रवेशद्वाराला कुलुपे लावण्यात आली. सुरक्षिततेच्या कारणास्तव ही प्रवेशद्वारे बंद करण्यात आल्याचे पालिकेतील अधिकाऱ्यांनी सांगितले.