म. टा. प्रतिनिधी, पुणे
अनेक अडचणींवर मात करून, प्रतिकूल परिस्थितीशी सामना करून दहावीला ९० टक्क्यांहून अधिक गुण मिळवणाऱ्या 'मटा हेल्पलाइन'च्या शिलेदारांना गरज आहे समाजातील दानशूर हातांची! त्यांच्या डोळ्यांत आता स्वप्ने आहेत डॉक्टर, इंजिनीअर, सीए, आयएएस होण्याची. त्यांच्याकडे जिद्द आहे, अभ्यास करायची तयारी आहे आणि गुणवत्ताही आहे; पण अडसर आहे तो प्रतिकूल आर्थिक परिस्थितीचा. या प्रतिकूलतेवर मात करून आयुष्यात काही करून दाखवण्याची जिद्दही त्यांनी दाखवली आहे. मात्र, या जिद्दीला हवे आहे दातृत्वाचे कोंदण!
अतिशय प्रतिकूल परिस्थितीतही जिद्दीने अभ्यास करून इयत्ता दहावीला ९० टक्क्यांहून अधिक गुण मिळवणाऱ्या विद्यार्थ्यांचे पुढील शिक्षण केवळ आर्थिक विवंचनेमुळे थांबू नये, याकरता 'मटा हेल्पलाइन' हा उपक्रम राबविण्यात येतो. या उपक्रमांतर्गत गुणवान; परंतु आर्थिकदृष्ट्या गरीब विद्यार्थ्यांच्या बातम्या 'महाराष्ट्र टाइम्स'मध्ये प्रसिद्ध केल्या जातात आणि त्यांना आर्थिक मदत करण्याचे आवाहन वाचकांना केले जाते. यंदा उपक्रमाचे नववे वर्ष असून, गेल्या काही दिवसांत आम्ही १५ गुणवंतांच्या गाथा प्रसिद्ध केल्या. त्यामध्ये आहे देवयानी कर्वे (९१.६० टक्के), जिचे स्वप्न आहे सीए होण्याचे, तर ९४ टक्के मिळविलेल्या प्रीती पाटीलला व्हायचे आहे आयएएस. निरंजन रायकरला (९३) कम्प्युटर इंजिनीअर व्हायचे आहे, तर साक्षी संकपाळचेही (९०.६० टक्के) इंजिनीअर होण्याचे ध्येय आहे. अंकिता सूर्यवंशीला (९३ टक्के) सॉफ्टवेअर इंजिनीअर, प्रगती अक्काला (९०.२० टक्के) कंपनी सेक्रेटरी, अनिशा रासकरला (९०.८० टक्के) डॉक्टर, हर्ष गायकवाडला (९२ टक्के) सीए, श्रुतिका बागूल (९४.२० टक्के), साक्षी विटकर (९१.४० टक्के) व प्रथमेश मांडवकरला (९१.४० टक्के) इंजिनीअर, तर मानसी काकिर्डे (९१.८० टक्के), शंकर घोरपडे (९३.८० टक्के), अंकिता अंबुरे (९२.८० टक्के) आणि रसिका मोझर यांना (९२.८० टक्के) व्हायचे आहे डॉक्टर. या १५ जणांना उच्च शिक्षणाचे शिखर गाठण्यासाठी हवे आहे तुमचे आर्थिक पाठबळ.
गेल्या आठ वर्षांत पन्नासहून अधिक मुलांना या उपक्रमांतर्गत मदत मिळाली आणि आज हे सर्वजण यशाची आणखी शिखरे पादाक्रांत करत आहेत. इतकेच नाही, तर आपल्या पंखांत आलेले बळ ते या नव्या विद्यार्थ्यांबरोबर शेअरही करत आहेत. खऱ्या अर्थाने आता दानतीचीही एक 'हेल्पलाइन' तयार होते आहे. अशा या उपक्रमात दर वर्षीप्रमाणेच यंदाही आपण सहभागी व्हाल, ही खात्री आणि अपेक्षाही.
बळ द्या पंखांना... २