म. टा. वृत्तसेवा, शिरूर
शिरुरच्या तहसीलदार लैला शेख यांच्या 'इंद्रप्रस्थ' बंगल्याची मध्यरात्री हेरगिरी करण्याच्या प्रकार उघडकीस आला आहे. या प्रकरणी विचारणा करण्यासाठी गेलेल्या शेख यांनाच दमदाटी करण्यात आली. अवेध वाळू उपशाच्या विरोधात कारवाई करत असल्याच्या रागातून हा प्रकार घडल्याची चर्चा आहे. दरम्यान, तहसीलदार शेख यांच्या पतीने वेळीच हस्तक्षेप केल्याने आरोपी पळून गेले. झालेल्या प्रकाराबाबत शेख यांनी शिरूर पोलिस ठाण्यात तक्रार दिली असून, आरोपींना पकडण्यासाठी पोलिसांनी पथके पाठविली आहेत.
या संदर्भातील माहिती देताना लैला शेख यांनी सांगितले की, '१३ फेब्रुवारी रोजी रात्री आठ वाजण्याच्या दरम्यान निमगाव दुडे येथील वन विभागाच्या जागेत मुरुम आणि वाळू उपसा चालू असल्याची माहिती मिळाली होती. याबाबत नायब तहसीलदार यांना फोन केला. परंतु, त्यांचा फोन बंद होता. त्यानंतर तेथील तलाठ्यांना तेथे पाठविले.
दरम्यान, पहाटे साडेतीनच्या दरम्यान कारवाईसाठी निघण्याच्या तयारीत असताना बंगल्या बाहेर दोन जण उभे असल्याचे आढळून आले. बाहेर पडल्यावर आरोपींनी वाद घालायला सुरुवात केली. 'लय वाळूचा गाड्या पकडता काय,' असे म्हणत दमदाटी केली. हा प्रकार पाहताच पतीने हस्तक्षेप केल्याने दोघे जण पळून गेले. त्यातील एकाच्या मोबाइल पतीच्या हाती लागला. दोघे पळून गेल्यानंतर काही वेळात त्यांचे इतर ५ ते ६ साथीदार एका गाडीतून बंगल्यासमोर आले. दरम्यान, त्याचवेळी पोलिस गाडीचा सायरन ऐकून आरोपींनी धूम ठोकली.'
शेख यांनी गेल्या काही दिवसांपासून अवैध वाळू उपसा करणाऱ्यांच्या विरोधात मोठी कारवाई करून दीड कोटींहून आधिक रकमेचा दंड वसूल केला आहे. यामुळे वाळू माफियांची धाबे दणाणले असून, यातूनच हेरगिरीचा प्रकार घडल्याची चर्चा आहे.
मागील काही दिवसांपासून वाळू माफियांकडून पाळत ठेवली जात असून, कारवाईला गेल्यानंतर नंबर नसलेल्या गाड्या पाठलाग करतात. काल घडलेल्या प्रकारानंतरही अवैध वाळू तस्करी करणारे व वाळू माफियांच्या विरोधात कारवाई चालूच राहिल.
\B- लैला शेख, \Bतहसीलदार, शिरूर
तहसीलदार लैला शेख यांना दमदाटी व त्यांच्या घराबाहेर पाळत ठेवल्याप्रकरणाचा तपास करण्यासाठी पथके तयार करण्यात आली आहेत. लवकरच आरोपींना पकडण्यात येईल.
\B- प्रवीण खानापुरे,\B पोलिस निरीक्षक, शिरूर