म. टा. प्रतिनिधी, पिंपरी
'आपल्या शास्त्रीय संगीताची परंपरा आपण जपायला हवी. ही आपल्या सगळ्यांची जबाबदारी आहे. पुढच्या पिढीला आपण ही संगीत परंपरा सोपवायला हवी,' असे भावपूर्ण उद्गार ज्येष्ठ गायिका बेगम परवीन सुलताना यांनी निगडी येथे काढले. स्वरसागर महोत्सवाच्या उद्घाटनप्रसंगी त्या बोलत होत्या. स्वरसागर महोत्सवाचे उद्घाटन गुरुवारी (२३ जानेवारी) करण्यात आले. यंदाचा १७ वा स्वरसागर पुरस्कार बेगम परवीन सुलताना यांना उपमहापौर तुषार हिंगे यांच्या हस्ते प्रदान करण्यात आला. मानपत्र, रोख पंचवीस हजार, स्मृतिचिन्ह असे पुरस्काराचे स्वरूप आहे.
या वेळी व्यासपीठावर माजी उपमहापौर शैलजा मोरे, नगरसेविका अनुराधा गोरखे, नगरसेवक राजू मिसाळ, आयुक्त श्रावण हर्डीकर, गायक महेश काळे, सांस्कृतिक समन्वयक प्रवीण तुपे आदी उपस्थित होते.
या वेळी परवीन सुलताना म्हणाल्या, 'पिंपरी-चिंचवडमध्ये मी पंधरा वर्षांनंतर आले आहे. येथील श्रोते चांगले संगीत ऐकणारे आहेत. आपण मला जो सन्मान दिलात, त्याबद्दल मी ऋणी आहे.' कार्यक्रमाच्या सुरुवातीला गायक संदीप ऊबाळे, योगिता गोडबोले आणि सुवर्णा राठोड यांचा मराठी सुगम संगीताचा कार्यक्रम सादर झाला. या वेळी संदीपने 'एकदंताय वक्रतुंडाय..', 'पाहिले न मी तुला' आणि संभाजी मालिकेचे शीर्षक गीत म्हणून श्रोत्यांची वाहवा मिऴवली. योगिताने 'चांदण्यात फिरताना', 'आताच बया का घाबरलं', 'गोऱ्या गोऱ्या मुखावरी' हे गीत सादर केले. सुवर्णाने 'अधीर मन झाले', 'जाळीमंदी पिकली करवंद' ही गीते पेश करून प्रेक्षकांची दाद मिळवली. 'की बोर्ड'वर केदार परांजपे, दर्शना नांदुरकर यांनी, तर तबल्यावर विक्रम भट, ऱ्हिदम मशिनवर अजय अत्रे यांनी साथ केली. स्नेहल दामले यांनी निवेदन केले.
कार्यक्रमाच्या दुसऱ्या सत्रात ज्येष्ठ गायिका बेगम परवीन सुलताना यांचे शास्त्रीय गायन झाले. त्यांनी सुरुवातीला राग पुरिया धनाश्री पेश केला. 'लागी मोरी लगन' हे विलंबित लयीत तर 'पायलिया झनकार मोरी' हे दृत लयीत सादर करून त्यांनी प्रेक्षकांना मंत्रमुग्ध केले. त्यानंतर लोकआग्रहास्तव 'रसिका तुझ्यासाठी' हे मराठी गीत सादर केले. कार्यक्रमाची सांगता 'भवानी दयानी' या भक्तिगीताने केली. स्मिता देशमुख यांनी तानपुऱ्यावर साथ केली. संवादिनीवर सचिन शेटे, पं. श्रीनिवास आचार्य यांनी साथ केली तर तबल्याची साथ पं. मुकुंदराज देव यांनी केली.
.
आजचे कार्यक्रम
आज, २४ जानेवारीला(शुक्रवार) लुई बँक्स, जॉर्ज ब्रुक्स त्यांच्या सहकाऱ्यांच्या साथीने भारतीय आणि पाश्चात्य वादनाचे फ्युजन सादर करणार आहेत. श्रद्धा शिंदे यांचे कथक आणि पवित्र भट यांचे भरतनाट्यम नृत्य होणार आहे.
.
ज्य़ेष्ठ गायिका बेगम परवीन सुलताना यांना स्वरसागर पुरस्कार प्रदान करताना (डावीकडून) प्रवीण तुपे, तुषार हिंगे, शैलजा मोरे, अनुराधा गोरखे, महेश काळे, श्रावण हर्डीकर, राजू मिसाळ आदी.