म. टा. प्रतिनिधी, पिंपरी
शहरातील रस्त्यांची यांत्रिकी पद्धतीने साफसफाई करण्याच्या योजनेला विरोध करण्यासाठी महापालिकेच्या कंत्राटी सफाई कामगारांनी काम बंद आंदोलनाचे शस्त्र उपसले आहे.
येत्या बुधावारपासून (२६ फेब्रुवारी) सफाई कामगार बेमुदत काम बंद आंदोलन करणार आहेत. त्यामुळे शहरातील स्वच्छता; तसेच कचऱ्याचा प्रश्न पेटणार असल्याची चिन्हे आहेत. या प्रश्नावरून पालिकेतील राजकारणही तापले असून, सत्ताधारी आणि विरोधकही आमने-सामने आले आहेत. महापालिकेच्या आठ क्षेत्रीय कार्यालयांतर्गत येणाऱ्या रस्त्यांची; तसेच जुन्या मुंबई-पुणे महामार्गाच्या दुतर्फा रस्त्यांची यांत्रिकी पद्धतीने दैनंदिन साफसफाई करण्यात येणार आहे. १ हजार ६७० किलोमीटर लांबीच्या रस्त्यांच्या साफसफाईच्या कामासाठी सहा विविध 'पॅकेजे'मध्ये विभागणी करून सात वर्षे कालावधीसाठी ६४७ कोटी रुपयांची निविदा काढली आहे. मात्र, यामुळे महापालिकेने कंत्राटी पद्धतीने घेतलेल्या १ हजार १०० कामगारांवर बेरोजगारीची कुऱ्हाड कोसळणार आहे. त्यामुळे ही निविदा रद्द करण्यासाठी सफाई कर्मचारी संघटना सरसावल्या आहेत. या पार्श्वभूमीवर 'ठराविक ठेकेदारांना डोळ्यासमोर ठेऊन नियम, अटी-शर्ती बनविल्याचा आणि निविदा प्रक्रियेत मोठा भ्रष्टाचार झाला आहे,' असा आरोप विरोधकांनीही केला असून, निविदा प्रक्रिया रद्द करण्याची मागणी केली आहे.