म. टा. प्रतिनिधी, पिंपरी
पिंपरी विधानसभेची निवडणूक लढविणारे आमदार गौतम चाबुकस्वार यांच्याकडे २३ लाख ४८ हजार रुपयांची मालमत्ता आहे. त्याच्या नावे कोणतीही स्थावर मालमत्ता नाही. त्यांच्या पत्नीच्या नावावर दोन कोटी ६५ लाख रुपयांची, तर मुलाच्या नावावर अडीच कोटींची मालमत्ता आहे. उमेदवारी अर्जासोबत दाखल करण्यात आलेल्या प्रतिज्ञापत्रात त्यांनी ही माहिती दिली. चाबुकस्वार यांनी विविध बँकांकडून सहा लाख २० हजार रुपयांचे, तर पत्नीने तीन लाख ३९ हजार रुपयांचे कर्ज घेतले आहे. त्यांच्याकडे केवळ पाच ग्रॅम सोने असून, त्याची किंमत २० हजार रुपये आहे. पत्नीकडे १०० ग्रॅम सोने असून, त्याची किंमत चार लाख रुपयाचे प्रतिज्ञापत्रात स्पष्ट करण्यात आले आहे. त्यांच्या नावावर २२ लाख ६५ हजार रुपयांची टोयोटा गाडी आहे. पत्नीच्या नावावर ११ लाख ७१ हजार रुपयांची ह्युंदाई कार आहे. १० हजार रुपयांची रोख रक्कम त्याच्याकडे असून, त्यांच्या पत्नीकडे केवळ दोन हजार रुपयांची रोख रक्कम असल्याचे या प्रतिज्ञापत्रात नमूद करण्यात आले आहे.