गर्लफ्रेंडसमोर पगार विचारल्यामुळे तरुणाला केली बेदम मारहाण

म. टा. प्रतिनिधी, पुणे

गर्लफ्रेंडसोबत हॉटेलमध्ये गप्पा मारत असताना एकाने पगार विचारल्यामुळे त्याला जबर मारहाण केल्याची घटना शनिवारी रात्री घडली. याप्रकरणी येरवडा पोलिस ठाण्यात गुन्हा दाखल करण्यात आला आहे. याबाबत निलेश शांताराम देशमुख (वय २८, रा. वडगाव शेरी) याने तक्रार दिली आहे. त्यानुसार रोहित मोरे, रॉनी अर्कस्वामी, अॅन्थोनी अर्क स्वामी व नानू यांच्यावर गुन्हा दाखल करण्यात आला आहे.

पोलिसांनी दिलेल्या माहितीनुसार, येरवडा येथील शास्त्रीनगर चौकातील एका हॉटेलमध्ये अॅन्थोनी हा त्याच्या गर्लफ्रेंडसोबत गप्पा मारत बसला होता. त्यावेळी तक्रारदार हा त्या ठिकाणी आला. त्याने आरोपी अॅन्थोनीला तुझा पगार किती आहे, तू कुठे काम करतोस, असे विचारले. त्यामुळे अॅन्थोनीला त्याचा राग आला. त्याने त्याच्या इतर मित्रांना बोलवून घेतले. त्यानंतर शास्त्रीनगर चौकात तक्रारदार याला गाठले. गर्लफ्रेंडसमोर पगार का विचारला असे म्हणत शिवीगाळ करून लोखंडी पाईपने पाठीवर पाठीवर, हातावर जबर मारहाण केली.

याप्रकरणी तक्रारदार यांनी पोलिसांकडे तक्रार दिल्यानंतर चौघांच्या विरोधात गुन्हा दाखल करण्यात आला आहे.