परभणी : येथील उच्चशिक्षीत असलेल्या युवकाने नेपाळ, भुतान या दोन देशासह भारतीतील नऊ राज्यात दुचाकीवरून साडेसहा हजार किलोमिटरचा प्रवास केला. या युवकाने प्रवासादरम्यान 'ग्रीन अर्थ, क्लीन अर्थ'साठी 'से नो टू सिंगल युज प्लास्टीक' चा संदेश देत प्लास्टीक बंदीसाठी जनजागृती केली.
परभणीतील शैलेश शेषराव कुलकर्णी या अवलियाची रायडींग ही पॅशन आहे. या आवडीतूनच त्यांनी आपल्या बुलेट मोटारसायकवर देशभर विविध कारणाने भ्रमंती केली आहे. सेवानिवृत्त पोलिस उपअधीक्षक एस. एम. कुलकर्णी यांचे चिरंजीव व अभियंते असलेले शैलेश कुलकर्णी यांना दुचाकीवर फिरण्याची मोठी हौस. या छंदाला त्यांनी समाजहिताची जोड दिली. शासनाने दोन ऑक्टोबर रोजी घातलेल्या सिंगल युज प्लास्टीवर बंदीचा प्रचार व प्रसार करण्यासाठी त्यांनी देशासह विदेशात जाऊन जनजागृती केली आहे.
लायन्स क्लबचे सदस्य असलेल्या शैलेश यांनी ३० ऑक्टोबर रोजी या प्रवासाला सुरवात केली. तब्बल १४ दिवसानंतर ते मंगळवारी सायंकाळी नागपूर मार्गे शहरात परतले. या दरम्यान, त्यांनी महाराष्ट्रतील अनेक जिल्हे, तेलंगाण, मध्यप्रदेश, उत्तरप्रदेश, बिहार, झारखंड, ओरिसा, छत्तीसगड, पश्चिम बंगाल आदीं जिल्ह्यातील अनेक शाळा, महाविद्यालयाने भेटी दिल्या. प्लास्टीच्या वापराचे दुष्परिणाम सांगितले. स्वच्छतेची शपथ दिली. त्याच बरोबर त्यांनी नेपाळ देशातील तीन जिल्हे व भुतान देशातील दोन जिल्ह्यांना देखील भेटी देऊन तेथही स्वच्छतेची शपथ दिली.
दरम्यान, भारत व बांगलादेशा दरम्यान असलेल्या सिमेवर वाघा सिमेवर ज्या पध्दतीने रिट्रीट होते, त्याचप्रमाणे संचलन सुरू झाले असता, तेथील सैनिकांमध्ये ते मिसळले. त्यांच्याशी प्लास्टीक बंदीबाबत चर्चा केली. त्याच बरोबर बांग्लादेशाच्या सैनिकांबरोबर देखील प्लास्टीक बंदीचा उहापोह त्यांनी केला. त्यांना देखील पत्रकाच्या माध्यमातून माहिती दिली. या १४ दिवसांच्या प्रवासात ते अनेक व्यक्ती, समुहांशी जोडल्या गेले. ठिकठिकाणी लायन्स क्लबच्या सदस्यांसह शाळा, महाविद्यालयांनी देखील त्यांचे स्वागत केला तसेच या निर्णयाची अंमलबजावणी करण्याचे देखील आश्वासने दिली.
मोटार सायकल रायडींग माझी पॅशन आहे. त्या निमित्ताने नुसते फिरण्यापेक्षा समाजाहितासाठी काही तरी करावे, समाजाला एखादा चांगला संदेश द्यावा, यासाठी हा प्रवास केला. या दरम्यान अतिशय चांगले व परिणामकारण अनुभव आले. त्यासाठी आई-वडीलांसह सासु-सासरे, पत्नी अपर्णा यांचे देखील मोठे पाठबळ मिळाल्याचे शैलेश कुलकर्णी यांनी सांगितले.