म. टा. प्रतिनिधी, पुणे
दरमहा हप्ता न दिल्यास अंगावर पेट्रोल ओतून जाळून घेण्याची धमकी देणाऱ्या १९ वर्षीय तरुणाच्या विरोधात पोलिसांनी गुन्हा दाखल करून, त्याला अटक केली आहे. हा तरुण बालगुन्हेगार असून, अल्पवयीन असताना त्यावर दोन गुन्हे दाखल असल्याची माहिती समोर आली आहे.
या प्रकरणी एका ४१ वर्षीय हॉटेल व्यावसायिकाने तक्रार दाखल केली आहे. रितेश विशाल पवार (वय १९, रा. वडगाव शेरी) असे अटक करण्यात आलेल्या आरोपीचे नाव आहे. वडगाव शेरी या भागात फिर्यादी यांचे हॉटेल आहे. तेथे आरोपी अल्पवयीन असल्यापासून मोफत जेवायला येत होता. जेवण झाल्यावर तो पैसे न देता दमदाटी करत असे. यामुळे त्याला घाबरून हॉटेल मालकही त्याला आजवर मोफत जेवण देत होता. गेल्या काही महिन्यांपासून या आरोपीचा त्रास वाढू लागल्याने फिर्यादी त्याला जेवण देण्यास टाळाटाळ करत होते. याचा राग मनात येऊन आरोपीने फिर्यादीला मोफत जेवणाबरोबरच आता दरमहा पाच हजार हप्ताही द्यावा लागेल, अशी धमकी दिली.
वेळेवर हप्ता न दिल्यास स्वत:च्या अंगावर पेट्रोल टाकून जाळून घेईन, असा दमही दिला. दरम्यान, शनिवारी आरोपी रितेश पुन्हा हॉटेलमध्ये आला, तेव्हा फिर्यादी नसल्याने त्याने हॉटेलमधील कर्मचाऱ्याचा मोबाइल घेतला. त्यात व्हिडिओ रेकॉर्डिंग करून, फिर्यादीचे नाव घेऊन, शिवीगाळ करून 'जिस दिन तू मुझे मिलेगा, उस दिन तेरी मुंडी अलग करके पोलिस स्टेशन भेजुंगा' अशी धमकी दिली. हॉटेलमधील कर्मचाऱ्याने हे रेकॉर्डिंग फिर्यादीला दाखविल्यानंतर त्यांनी तातडीने येरवडा पोलिस स्टेशनमध्ये धाव घेऊन तक्रार नोंदवली. या प्रकरणाचा पुढील तपास सहायक पोलिस निरीक्षक बलभीम ननवरे करीत आहेत.