म. टा. प्रतिनिधी, पिंपरी
दामदुप्पट रकमेचे; तसेच जादा व्याजाचे आमिष दाखवून, १० हजार गुंतवणूकदारांची तब्बल १०० कोटींहून अधिक रकमेची फसवणूक करून, तीन वर्षे फरार झालेल्या वैकुंठ कुंभार, त्याची पत्नी राणी कुंभार आणि मेव्हणा रामदास बबन शिवले या तिघांना मध्य प्रदेशातील इंदूरमधून अटक करण्यात आली आहे. पिंपरी- चिंचवड शहर पोलिसांच्या आर्थिक शाखेने ही कारावाई केली असून, या प्रकरणी या पूर्वी तीन जणांना अटक केली आहे.
'संस्कार ग्रुप'च्या माध्यमातून जादा व्याज; तसेच दामदुप्पट योजनेच्या नावाखाली वैकुंठ व राणी कुंभार आणि शिवले यांच्यासह १७ जणांनी १० हजार गुंतवणूकदारांची १०० कोटींहून अधिक रुपयांची फसवणूक केली होती. गुन्हा दाखल झाल्यावर आरोपीने कुटुंबीयांसह शहरातून पळ काढला होता. तीन वर्षांनंतरही आरोपी हाती लागत नसल्याने गुंतवणूकदारांनी माजी पोलिस आयुक्त आर. के. पद्मनाभन यांची भेट घेऊन, आरोपींना अटक करण्याची मागणी केली होती. तेव्हापासून आर्थिक गुन्हे शाखेचे पथक आरोपींच्या मागावर होते. अखेर इंदूर येथून वैकुंठ, राणी आणि रामदास या आरोपींना अटक केली आहे. अजय लेले, शिवाजी ढमढेरे व कमल शेळके यांना यापूर्वीच अटक झाली आहे.
आर्थिक गुन्हे शाखेचे पोलिस कुंभार याला पकडण्यासाठी इंदूरमध्ये पोहोचले. त्या वेळी तो पत्नीसोबत मुलांना शाळेतून आणण्यासाठी गेला होता. तो शाळेच्या आवारातून बाहेर पडताच पोलिसांनी त्याला ताब्यात घेतले. न्यायालयाने त्याला सात दिवसांची पोलिस कोठडी सुनावली आहे. आर्थिक गुन्हे शाखेचे निरीक्षक श्रीराम पोळ, महेंद्र कदम, सागर काटे, प्रशांत महाले, शरद आहेर, वसंत मुळे, कर्मचारी बाळासाहेब दौंडकर, संजय पवार यांच्या पथकाने ही कामगिरी केली.
अशी होती साखळी
- संस्कर ग्रुपने गुंतवणूकदारांपैकी अनेकांना एजंट म्हणून तयार केले होते.
- आम्ही गुंतवणूक केली आहे, आपल्यालाही १८ ते २४ टक्के व्याज मिळत असल्याचे इतरांना सांगून, त्यांना गुंतवणूक करण्यास भाग पाडले होते.
- त्यातून एजंटांना आर्थिक मोबदलाही मिळला होता.
- जादा व्याज मिळत असल्याने अनेकांनी आपली सर्व पुंजी 'संस्कार ग्रुप'मध्ये गुंतवली होती.
पैसे मिळत नसल्याने भांडे फुटले
गुंतवणुकीच्या कालावधीची मुदत संपल्याने अनेक गुंतवणूकदारांनी पैसे परत घेण्यासाठी 'संस्कार'च्या कार्यालयाशी संपर्क केला. मात्र, आरोपींनी उद्या पैसे देतो, नंतर देतो, असे सांगून पैसे देण्यास टाळाटाळ केली. अनेक दिवस हेलपाटे मारूनही पैसे मिळत नसल्याने फसवणूक झाल्याचे गुंतवणूकदारांच्या लक्षात आले. त्यानंतर गुंतवणूकदारांनी संस्कारच्या कार्यालयाची तोडफोड करून, दिघी पोलिस ठाण्यात गुन्हा दाखल केला. त्यानंतर आरोपींनी अटकपूर्व जामिनासाठी अर्ज केला. मात्र, तो फेटाळल्यानंतर वैकुंठ कुंभार याने आपल्या कुटुंबीय व नातेवाईकांसह शहरातून पळ काढला.