म. टा. प्रतिनिधी, पिंपरी
कंपनीची तिमाही बैठक संपल्यावर मुंबईला वर्षाविहारासाठी जाऊन तेथून परतत असताना झालेल्या अपघातात सेटको स्पिंडल कंपनीच्या तिघा उच्चपदस्य अधिकाऱ्यांचा मृत्यू झाला. मुंबई-पुणे एक्स्प्रेस वेवर रावेत येथील एका हॉटेलसमोर स्विफ्ट कार आणि ट्रकमध्ये रविवारी (७ जुलै) सकाळी सहाच्या सुमारास हा अपघात झाला. यामध्ये स्विफ्ट कारमधील तिघांचा मृत्यू झाला, तर एकजण गंभीर जखमी झाला आहे. या अपघातामुळे एक्स्प्रेस वे वर काही काळ वाहतूक कोंडी झाली होती.
नीलेश हरिदास साळुंके (वय ३०, रा. सोलापूर), अभिषेक रवींद्र शर्मा (वय २६, रा. काशिपूर, उत्तराखंड), पराग प्रवीण हरेगावकर (वय २९, रा. प्रथमा हाउसिंग सोसायटी, लोकमान्य कॉलनी, कोथरूड) या तिघांचा अपघातात जागीच मृत्यू झाला, तर सूरज राजेंद्र मांजरे (वय २७, रा. सोलापूर) या अपघातात गंभीर जखमी झाले आहेत. त्यांच्यावर खासगी रुग्णालयात उपचार सुरू आहेत. या प्रकरणी ट्रकचालक क्युबभाई गफुरभाई वाची (वय ४७, रा. गुजरात) याच्याविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, नांदेडफाटा येथे असलेल्या सेटको स्पिंडल इंडिया या कंपनीची तिमाही बैठक शनिवारी होती. नीलेश साळुंके या कंपनीत एचआर मॅनेजर, अभिषेक शर्मा दिल्ली प्रतिनिधी, तर पराग हरेगावकर सेल्स इंजिनीअर पदावर कार्यरत होते. मूळचे सोलापूरचे असणारे साळुंके व मांजरे हे सध्या कंपनीमध्येच पुण्यात वास्तव्याला आहेत. बैठकीसाठी विविध भागातून प्रतिनिधी आणि व्यवस्थापक पुण्यात आले होते. बैठक संपल्यावर नीलेश, अभिषेक, पराग, सूरज हे वर्षाविहारासाठी मुंबईला गेले. तेथून ते रविवारी मध्यरात्री पुण्याकडे परतत होते. या चौघांबरोबर त्यांचा अन्य एक सहकारीदेखील होता. तो मुंबईतूनच त्याच्या मूळगावी गेल्याचे पोलिसांनी सांगितले.
मुंबई-पुणे एक्स्प्रेस वे वर रविवारी सकाळी सहाच्या सुमारास चौघे स्विफ्ट कार मुंबईहून पुण्याकडे येत होते. त्या वेळी रावेत येथील एका हॉटेलसमोर एक ट्रक थांबला होता. या ट्रकवर कारची मागून जोरदार धडक बसली. दरम्यान, ट्रकचालकाने ट्रक रस्त्यात उभा करताना पार्किंग लाइट लावलेली नव्हती. त्यामुळे अंदाज न आल्याने कार ट्रकवर धडकली. निरीक्षक ज्ञानेश्वर साबळे तपास करीत आहेत.