म. टा. प्रतिनिधी, पिंपरी
बेकायदा पिस्तूलविक्रीच्या प्रयत्नातील तिघांना पिंपरी-चिंचवड गुन्हे शाखा युनिट पाचच्या पथकाने अटक केली आहे. दोन भिन्न कारवाईमध्ये या तिघांकडून सात पिस्तुले आणि ५ जिवंत काडतुसे जप्त केली आहेत.
मनोज विष्णू जगताप (वय २०, रा. हडपसर, मूळ रा. अहमदनगर), जॉन काशिनो परेरा (वय ३१, रा. नालेगाव वाघगल्ली, ता. अहमदनगर) अशी अटक केलेल्या आरोपींची नावे आहेत. या प्रकरणी पोलिस शिपाई ज्ञानेश्वर शंकर गाडेकर यांनी देहूरोड पोलिस ठाण्यात फिर्याद दिली आहे.
सहायक आयुक्त श्रीधर जाधव यांनी दिलेल्या माहितीनुसार, रावेत येथील हॉटेल निसर्गजवळ दोघे जण पिस्तुलविक्रीसाठी येणार असल्याची माहिती सहायक निरीक्षक राम गोमारे यांना मिळाली होती. त्यानुसार पथकाने सापळा रचून जगताप व परेरा या दोघांना पकडले. दोघांच्या कमरेला प्रत्येकी एक पिस्तूल व खिशात काडतुसे आढळून आली. त्यांच्याकडे अधिक चौकशीमध्ये या दोघांनी विनापरवाना पिस्तूल बाळगून ते बेकायदा विक्रीसाठी आणल्याचे सांगितले. या दोघांकडे झालेल्या तपासात सहा पिस्तुले आणि तीन जिवंत काडतुसे जप्त करण्यात आली आहेत.
दुसऱ्या एका कारवाईत सोमाटणे फाटा येथे काही व्यक्ती पिस्तूलविक्रीसाठी येणार असल्याची माहिती पोलिस कर्मचारी ज्ञानेश्वर गाडेकर, दयानंद खेडकर, धनंजय भोसले यांना मिळाली होती. त्यानुसार पथकाने सापळा रचून दीपक लिंबाजी सरोदे (वय ३१, रा. हडपसर) याला अटक करण्यात आली. त्याच्याकडे पिस्तुल व दोन जिवंत काडतुसे आढळून आली. त्यावरून सरोदे याच्यावर तळेगाव दाभाडे तर जगताप व परेरा या दोघांवर देहूरोड पोलिस ठाण्यात गुन्हा दाखल करण्यात आला आहे. पोलिस कर्मचारी मयूर वाडकर, दत्तात्रेय बनसुडे, फारूक मुल्ला, संदीप ठाकरे, धनराज किरनाळे, गणेश मालसुरे सावन राठोड, राजेंद्र शेटे आदींसह पथकाने ही कामगिरी केली आहे.
- जप्त केलेल्या पिस्तुलांसह पोलिस अधिकारी, कर्मचारी.