म. टा. प्रतिनिधी, पुणे
प्राप्तीकर विभागाचे अधिकारी असल्याचे सांगून, खंबाटकी घाटातून सराफाचे अपहरण करून दोन कोटी ९० लाखांचे सोन्याचे दागिने लुटल्याचा गुन्हा पुणे ग्रामीण पोलिसांनी उघडकीस आणला आहे. या प्रकरणी तिघांना अटक केली असून, त्यांच्याकडून ३३ किलो घाऊक व दहा किलो निव्वळ वजनाचे सोने असा दोन कोटी ९० लाख रुपयांचा मुद्देमाल जप्त केला आहे. खंबाटकी घाटातून त्यांना भोर-महाड मार्गावरील हिर्डोशी हद्दीत घेऊन जात असताना शनिवारी सायंकाळी लुटण्यात आले होते.
शंतनू नितीन डांगे (वय ३२, रा. सदिच्छा अपार्टमेंट, नवसाह्याद्री, कर्वेनगर), संदीप ज्ञानेश्वर राजीवडे (३२) व राहुल बाळकृष्ण धवले (२८, रा. ढोणे अपार्टमेंट, वारजे माळवाडी) अशी अटक केलेल्यांची नावे आहेत. तर, महेश साळुंखे (३०, रा. कात्रज) हा फरार आहे. या प्रकरणी सराफ व्यवसायिक मीत शहा (रा. निपाणी) यांनी दिलेल्या तक्रारीवरून खंडाळा पोलिस ठाण्यात अपहरण व जबरी चोरीचा गुन्हा दाखल करण्यात आला होता.
पोलिसांनी दिलेल्या माहितीनुसार, शहा हे सोन्याचे दागिने तयार करून सराफ व्यवसायिकांना विक्री करण्याचा व्यवसाय आहे. सराफ व्यवसायिकांना सोन्याच्या दागिन्यांचे डिझाइन दाखवून त्यप्रमाणे दागिने बनवून देतात. १९ ऑगस्ट रोजी मीत शहा व त्यांची आई सोन्याचे दागिने घेऊन चारचाकी गाडीने पुण्यावरून निपाणीला निघाले होते. खंबाटकी घाटात आल्यानंतर त्यांच्या गाडीला लाल दिव्याच्या चारचाकीने थांबविले. त्या गाडीमधून उतरलेल्या व्यक्तींनी ‘आम्ही प्राप्तिकर विभागाचे अधिकारी आहोत, आमच्याबरोबर पुण्याला चला’ असे सांगण्यात आले. त्यानंतर शहा व त्यांची आई तसेच चालक यांना गाडीतील सामानासह आपल्या गाडीत घेतले. भोर-महाड मार्गावर हिर्डोशीला गेल्यावर मीत शहा आणि त्यांच्या आईला पिस्तुलाचा धाक दाखवून त्यांच्याजवळची दागिन्यांची पिशवी, रोख रक्कम, मोबाइल असा ऐवज चोरट्यांनी घेऊन पसार झाले होते. चालकाने त्याच्या मोबाइलवरून शहा यांच्या नातेवाइकांना हा प्रकार कळविला.
या प्रकरणी पुणे ग्रामीणचे अधीक्षक सुवेझ हक यांच्या मार्गदर्शनाखाली स्थानिक गुन्हे शाखेचे पोलिस निरीक्षक दयानंद गावडे यांच्या पथकाने आरोपीचा शोध सुरू केला. आरोपींनी वापलेल्या कारचा क्रमांक खेड शिवापूर टोलनाक्यांच्या सीसीटीव्हीत सापडला. त्यानंतर त्यावरून गाडीची माहिती काढली असता ती कार मालकाने सर्व्हिसिंगला दिल्याचे समोर आले. त्यानुसार गॅरेजमालकाचा शोध घेतल्यानंतर आरोपींची माहिती मिळाली. त्यानुसार तिघांना ताब्यात घेतले. त्यांच्याकडे चौकशी केल्यानंतर घटनेचा उलगडा झाला.
भोर-महाड रस्त्यावर लुटल्यानंतर आरोपी ऐवज घेऊन जात असताना वरंधा घाटाच्या खाली त्यांना रायगड पोलिसांची नाकाबंदी दिसली. आरोपीनी त्यांच्याकडील कार न थांबवता तशीच पुढे नेली. परंतु, त्याच्या पुढेही नाकाबंदी असेल आणि पोलिस पकडतील म्हणून त्यांनी कार एका कच्च्या रस्त्याने आत नेली. त्या रस्त्यावर उभ्या मोडकळीस आलेल्या ट्रकमध्ये सर्व सोन्याचे दागिने व ऐवजाच्या पिशव्या टाकून आरोपी पळून गेले होते. ही माहिती मिळाल्यानंतर पुणे ग्रामीण पोलिसांनी भोर आणि खंडाळा पोलिसांच्या मदतीने गुन्ह्यातील चोरीस गेलेली ३३ किलो घाऊक व दहा किलो निव्वळ असे दोन कोटी ९० लाख रुपयांचे दागिने जप्त केले. या गुन्ह्यातील मुख्य आरोपी फरार असून, त्याला मिळालेल्या टिपवरून त्याने ही योजना आखल्याचे तपासात समोर आले आहे.