पालिकेच्या मालकीचे साहित्य रस्त्यावर फेकले

म. टा. प्रतिनिधी, येरवडा

एमआयएम पक्षाच्या नगरसेविकेच्या पतीने कार्यकर्त्यांच्या मदतीने लक्ष्मीनगरमधील महापालिकेच्या मालकीची आरोग्य कोठी उघडून आतील साहित्य रस्त्यावर टाकून कोठीचा ताबा घेतल्याचा प्रकार उघडकीस आला. पालिका उपायुक्त विजय दहिभाते यांनी संबंधितांवर फौजदारी गुन्हा दाखल करण्याचे आदेश सहायक आयुक्तांना दिले आहेत.

येरवडा येथील लक्ष्मीनगर भागात पालिकेच्या मालकीची आरोग्य कोठी आहे. एमआयएम पक्षाच्या नगरसेविका आश्विनी लांडगे यांच्या निधीतून काही दिवसांपूर्वी आरोग्य कोठीला रंगरंगोटी करण्यात आली. लांडगे यांचे पती डॅनियल लांडगे आणि त्यांच्या दोन कार्यकर्त्यांनी शनिवारी सायंकाळी लक्ष्मीनगरमध्ये जाऊन काही कार्यक्रम असल्याचे सांगून कोठी रिकामी करण्यासाठी आरोग्य निरीक्षकांना फोन केला. त्यावर आरोग्य निरीक्षकांनी कोठीत पालिकेचे साहित्य असून पर्यायी जागा उपलब्ध झाल्याशिवाय रिकामी करता येणार नसल्याचे सांगितले. त्यावर लांडगे यांनी ठेकेदाराकडून चावी घेऊन कोठीतील साहित्य रस्त्यावर काढून रिकामी केली. हा प्रकार नगरसेवकांना समजताच शिवसेना गटनेते संजय भोसले, नगरसेवक अविनाश साळवे,नगरसेविका श्वेता चव्हाण, उपशहर प्रमुख आनंद गोयल आणि कार्यकर्त्यांनी सोमवारी येरवडा क्षेत्रीय कार्यालय गाठले. विभागीय उपायुक्त विजय दहिभाते यांना दालनात भेटून पालिकेच्या मालकीची आरोग्य कोठीचा ताबा घेणाऱ्यांवर कारवाईची मागणी केली. त्यावर दहिभाते यांनी संबंधित आरोग्य निरीक्षकांना अहवाल सादर करण्यास सांगितले. काही वेळाने अहवाल प्राप्त झाल्यानंतर परस्पर आरोग्य कोठीचा ताबा घेऊन पालिकेची मालमत्ता रस्त्यावर टाकणाऱ्या संबंधितांवर फौजदारी गुन्हा दाखल करण्याचे आदेश येरवडा क्षेत्रीय कार्यालयाचे सहायक आयुक्त विजय लांडगे यांना दिले. यापूर्वीदेखील येरवडा प्रभाग ६मध्ये विकासकामांवरून एमआयएम आणि शिवसेना कार्यकर्त्यांमध्ये वादावादी आणि खडाजंगी झालेल्या आहेत.

कोट

महापालिकेच्या मालकीची आरोग्य कोठी कुणीही व्यक्ती अथवा नगरसेवक परस्पर ताब्यात घेऊ शकत नाही. आरोग्य निरीक्षकाकडून चावी घेऊन कोठीतील पालिकेचे साहित्य रस्त्यावर टाकून देणाऱ्यांवर महापालिकेने कठोर कारवाई करण्याची मागणी केली आहे. पालिका अधिकाऱ्यांनीदेखील कोणाच्याही दबावाला बळी न पडता कारवाई करावी.

- संजय भोसले, गटनेते, शिवसेना

येरवडा लक्ष्मीनगर येथील आरोग्य कोठी परस्पर ताब्यात घेतलेला प्रकार घडला आहे. या प्रकरणी संबंधित आरोग्य निरीक्षकाकडून अहवाल प्राप्त झाला असून कोठी रिकामी करून साहित्य रस्त्यावर ठेवून देणाऱ्यांवर फौजदारी गुन्हा दाखल करण्याचे आदेश येरवडा सहायक आयुक्तांना दिले आहेत.

विजय दहिभाते, उपायुक्त

संबंधित आरोग्य कोठीची रंगरंगोटी झाल्यानंतर वायरिंगचे काम करावयाचे असल्याने शनिवारी कोठीची पाहणी केली. मात्र, कोठीतील एकही साहित्य बाहेर काढले नाही; तसेच कोठीचा ताबा घेतलेला नाही. शिवसेना नगरसेवक राजकीय सूडबुद्धीने आरोप करीत आहेत.

डॅनियल लांडगे