म. टा. प्रतिनिधी, पुणे
झारखंड राज्यातील समेध शिखरजी या जैन धर्मियांच्या पवित्र तीर्थस्थळाच्या संरक्षणार्थ येथील जैन समाजातील महिला भाजपच्या पुणे शहर कार्यालयावर मूक मोर्चा काढणार आहेत. येत्या शनिवारी (दि. १३) हा मूक मोर्चा काढण्यात येणार आहे.
या संदर्भात मूक मोर्चाच्या संयोजिका शर्मिला ओसवाल यांनी माहिती दिली. झारखंड सरकारने समेध शिखरजी येथे पर्यटन सुरू करण्याचा निर्णय घेतल्याने त्याठिकाणी मांस, मटन दारू मिळणार असून रेस्टॉरंट सुरू होत आहेत. समेध शिखरजी येथे जैन धर्माच्या २४ तीर्थकरांपैकी २० तीर्थंकरांचे निर्वाण झाले आहे. आता त्याच ठिकाणी पर्यटनाच्या निर्णयामुळे पवित्र स्थानाचे पावित्र्य धोक्यात येणार असल्याने जैन समाजात असंतोष निर्माण झाला आहे.
झारखंड सरकारच्या निर्णयाला विरोध म्हणून शनिवारी सकाळी १० वाजता जंगली महाराज रस्त्यावरील संभाजी उद्यानापासून मूक मोर्चाला सुरुवात होणार आहे. यामध्ये जैन समाजातील महिला एकत्र येणार आहेत. शहर भाजपच्या कार्यालयावर हा मोर्चा जाईल. त्याठिकाणी भाजपचे शहराध्यक्ष व पदाधिकारी यांना समेध शिखरजी संदर्भातील निवेदन दिले जाईल. मूक मोर्चाचे संयोजन शर्मिला ओसवाल, रिटा गांधी, सुलभा भंडारी, कविता शहा, स्वाती मेहता यांनी केले आहे.