'गड-मॅरेथॉन'च्या नोंदणीचा
आज शेवटचा दिवस
म. टा. प्रतिनिधी, पुणे
इतिहासाची ओळख नव्या पिढीला घडावी आणि गडांचा इतिहास जगभरात पोहोचावा, या हेतूने आयोजित सिंहगड, राजगड आणि तोरणा (एसआरटी) मॅरेथॉन स्पर्धेला पाच देश, आठ राज्ये आणि २८ शहरातील स्पर्धकांनी प्रतिसाद दिला आहे. येत्या ९ डिसेंबरला ही स्पर्धा होणार असून, स्पर्धेचा फ्लॅगऑफ सकाळी ६ वाजता सिंहगड पायथ्याच्या आतकरवाडी येथून होणार आहे.
११ किलोमीटर (सिंहगड पायथा- नरवीर तानाजी मालुसरे समाधी- सिंहगड पायथा, वय वर्षे १५ व त्यापुढे), २५ किलोमीटर (सिंहगड ते राजगड, सिंहगड पायथा, नरवीर समाधी, कल्याण दरवाजा, विंझर, साखर, गुंजवणी, वय वर्षे १८ आणि त्यापुढे); तसेच ५० किलोमीटर (सिंहगड- राजगड- तोरणा, सिंहगड पायथा- नरवीर समाधी- कल्याण दरवाजा- विंझर- साखर- गुंजवणे- राजगड- संजीवनी माचीमार्गे बुधला माची, तोरणागड- वेल्हा, वय वर्षे १८ आणि पुढे) अशा तीन गटांत ही स्पर्धा होणार आहे. यंदा या स्पर्धेचे पहिले वर्ष आहे. सिंहगड, राजगड आणि तोरणा या गडांच्या प्रेरणादायी इतिहासाला उजाळा, शिवछत्रपतींनी दिलेल्या इतिहासाच्या वारशाला अभिवादन या हेतूने स्पर्धेचे आयोजन वेस्टर्न घाट रनिंग फाउंडेशनने केले असल्याची माहिती अॅड. मारुती गोळे आणि दिग्विजय जेधे यांनी दिली.
या स्पर्धेसाठी नावनोंदणी करण्याचा आज (३० नोव्हेंबर) हा शेवटचा दिवस आहे. अधिक माहितीसाठी www.wgrf.in या वेबसाइटला भेट द्यावी, असे आवाहन फाउंडेशनने केले आहे.