म. टा. प्रतिनिधी, पुणे
चतुःशृंगी पोलिस ठाण्याच्या हद्दीत कुरकुरे घेऊन देण्याच्या बहाण्याने तीन वर्षांच्या मुलीवर लैंगिक अत्याचार केल्याचा प्रकार समोर आला आहे. या प्रकरणी चतुःशृंगी पोलिसांनी तरुणाला अटक केली आहे. शंभुकुमार दुखी राय (वय २१, रा. पाषाण, मूळ रा. बिहार) असे अटक केलेल्याचे नाव आहे. याबाबत मुलीच्या आईने चतुःशृंगी पोलिस ठाण्यात तक्रार दिली आहे. पोलिसांनी दिलेल्या माहितीनुसार, आरोपी बिगारी कामगार आहे. पीडित मुलीचे कुटुंब व आरोपी एका साइटवर काम करतात. शनिवारी सायंकाळी आरोपीने पीडित मुलगी घराजवळ खेळत असताना तिला कुरकुरे खाण्यास देतो, असे म्हणून घेऊन गेला. त्यानंतर घराच्या पाठीमागील झाडीत नेऊन तिचे तोंड दाबून अत्याचार केले. पालकांना हा प्रकार समजाताच त्यांनी पोलिसांकडे धाव घेतली. या प्रकरणी चतुःशृंगी पोलिसांनी आरोपीला अटक केली आहे.
.
रुग्णालयातून आरोपी पळाला
पुणे : पोलिस कोठडीत असलेल्या आरोपीला उपचारासाठी घेऊन गेल्यानंतर त्याने रुग्णालयाच्या शौचालयातील खिडकीतून पलायन केल्याचा प्रकार कमलनयन रुग्णालयात घडला. या प्रकरणी खडक पोलिस ठाण्यात गुन्हा दाखल करण्यात आला आहे. अनुराग कमलेश भाटीया (वय २३, रा. पाषाण-सूस रस्ता) असे पळून गेलेल्या आरोपीचे नाव आहे. या प्रकरणी सहायक पोलिस निरीक्षक उमाजी राठोड यांनी तक्रार दिली आहे. पोलिसांनी दिलेल्या माहितीनुसार, अनुराग भाटीया याने त्याच्या व्यावसायिक पार्टनरवर कोयत्याने वार करून जीवे मारण्याचा प्रयत्न केला होता. याप्रकरणी खडक पोलिसांनी त्याला अटक केली होती. त्याला कोर्टाने पोलिस कोठडीत ठेवण्याचे आदेश दिले होते. पोलिस कोठडीत असताना त्याला रविवारी जुलाब व उलट्यांचा त्रास होत होता. त्या वेळी सहायक पोलिस निरीक्षक उमाजी राठोड यांनी त्याला शिवाजी रस्त्यावरील कमलनयन रुग्णालयात घेऊन गेले. या ठिकाणी डॉक्टरांनी त्याची तपासणी केली. डॉक्टरांनी लिहून दिलेली औषधे आणण्यासाठी एक पोलिस कर्मचारी गेला. त्या वेळी आरोपीने पुन्हा त्रास होत असल्याचे सांगितल्यामुळे राठोड यांनी त्याला रुग्णालयातील शौचालयात नेले. त्या वेळी आरोपी शौचालयातील उघड्या खिडकीतून पळाला. पोलिस त्याचा शोध घेत आहेत. या प्रकरणी सहायक पोलिस निरीक्षक व्ही. एस. पवार अधिक तपास करीत आहेत.