म. टा. प्रतिनिधी, पुणे
नागरिकता संशोधन कायदा-२०१९ च्या (सीएए) विरोधात येत्या रविवारी (२९ डिसेंबर) गोळीबार मैदान ते कौन्सिल हॉल चौक यादरम्यान मोर्चा काढण्यात येणार आहे. त्यामुळे कॅम्प परिसर, भवानी पेठ आणि पुणे स्टेशन परिसरातील वाहतुकीत बदल करण्यात आला आहे.
रविवारी सकाळी ११च्या सुमारास गोळीबार मैदान येथून मोर्चाला सुरुवात होणार आहे. हा मोर्चा शंकरशेठ रस्ता- चिमणराव ढोले (सेव्हन लव्हज) चौकातून
उजवीकडे वळून नेहरू रस्त्याने सोनावणे हॉस्पिटल-रामोशी गेट- संत कबीर चौक-रास्ता पेठ पॉवर हाऊस चौक- नरपतगीर चौक- मालधक्का चौक- ससून हॉस्पिटल-डॉ. बाबासाहेब आंबेडकर पुतळा- साधू वासवानी चौकमार्गे कौन्सिल हॉल चौकात पोहोचणार आहे. या मोर्चात मोठ्या प्रमाणात नागरिक सहभागी होण्याची शक्यता आहे. त्यामुळे
मोर्चा मार्गावरील वाहतूक बंद ठेवण्यात येणार आहे. नागरिकांनी मोर्चा मार्ग टाळून पर्यायी मार्गाने ये-जा करावी, असे आवाहन वाहतूक पोलिस शाखेच्या अधिकाऱ्यांनी केले आहे. पर्यायी मार्ग https://www.punetrafwatch.com या वेबसाइटवर पाहायला मिळणार आहे. तसेच, मोर्चाच्या दिवशीचे 'लाइव्ह अपडेट्स'ही या वेबसाइटवर असणार आहेत.