म. टा. वृत्तसेवा दौंड
मुंबईहून उद्यान एक्स्प्रेसने प्रवास करत असलेल्या 'करोना' संशयित प्रवाशाला दौंड रेल्वे स्थानकात उतरवण्यात आले असून, त्याला पुढील चाचण्यांसाठी रुग्णवाहिकेतून पुण्यातील नायडू रुग्णालयात पाठवण्यात आले. दरम्यान, या व्यक्तीला दौंड रेल्वे स्थानकात उतरवून घेतल्यानंतर पुढे पाठवण्यासाठी रुग्णवाहिका दीड ते दोन तास उपलब्ध न झाल्याने रेल्वे स्थानक परिसरात घबराट पसरली होती.
'होम क्वारंटाइन'चा शिक्का हातावर असतानाही कतारहून आलेल्या या अठ्ठावीस वर्षीय भारतीय नागरिकाने मुंबई येथून गुलबर्ग्याजवळील (कर्नाटक) गावी जाण्यासाठी थेट 'उद्यान एक्स्प्रेस' गाठली. जनरलचे तिकीट काढून तो सरळ आरक्षित डब्यात बसला.
'उद्यान एक्स्प्रेस' दुपारी पावणेबाराच्या दरम्यान पुणे स्थानकात आल्यानंतर 'एस ५' या आरक्षित डब्यातून 'होम क्वारंटाइन'चा शिक्का हातावर असतानाही एक व्यक्ती प्रवास करीत असल्याचे तिकीट तपासनीसाच्या लक्षात आले. त्यानंतर त्यांनी हा प्रकार रेल्वेच्या नियंत्रण कक्षाला कळवला रेल्वेच्या नियंत्रण कक्षाने संबंधित व्यक्तीचे वर्णन तो कुठल्या डब्यातून प्रवास करतोय याची सविस्तर माहिती दौंड रेल्वे स्थानकाचे व्यवस्थापक सॅम्युअल क्लिफ्टन, रेल्वे रुग्णालयाचे डॉक्टर श्रीनिवास, दौंड रेल्वे पोलिस व रेल्वे सुरक्षा बल यांना कळवले. ही गाडी एक वाजता स्थानकात येण्यापूर्वी त्या रुग्णाला उतरवून घेण्यासाठी रेल्वे प्रशासन व रेल्वे सुरक्षा दलाकडून सगळी तयारी करण्यात आली.
'उद्यान एक्स्प्रेस' दौंड रेल्वे स्थानकावर प्लॅटफॉर्म क्रमांक ६वर दाखल होताच त्या संशयित रुग्णाला उतरवून स्ट्रेचरवर झोपवण्यात आले. त्यानंतर संपूर्ण डब्यातील प्रवाशांवर निर्जंतुकीकरण फवारणी करण्यात आली. नंतर हा डब्बा पूर्ण रिकामा करण्यात आला आणि या डब्यातील प्रवाशांना इतर डब्यात बसवण्यात आले. त्या संशयिताने प्रवास केलेला डबा शक्य तेवढा स्वच्छ करण्याचा प्रयत्न करण्यात आला. त्यानंतर ही गाडी पुढील प्रवासासाठी रवाना करण्यात आली.
रेल्वे पोलिस स्टेशनचे प्रभारी युवराज कलकुटगे, पोलिस उपनिरीक्षक ताराचंद सुडगे, रेल्वे सुरक्षा बलाचे पोलिस उपनिरीक्षक सुनील यादव, बलराम होड्डा, प्रमोद पवार, अनिल यादव, प्रल्हाद मीना, डी. जे. इंगळे यांनी संबंधित प्रवाशाला ताब्यात घेतले.
...
दौंड पंचायत समितीने 'करोना'च्या पार्श्वभूमीवर तालुकास्तरीय आपत्ती व्यवस्थापन नियंत्रण कक्षाची स्थापना केली आहे. तालुका आरोग्य अधिकारी डॉ. अशोक रासगे या कक्षाचे प्रमुख असून, दोन आरोग्य पर्यवेक्षक, एक आरोग्य सहायक, एक आरोग्य सेवक या कक्षात आहे. मार्गदर्शन व तपासणीसाठी या कक्षात २४ तास कर्मचारी उपस्थित राहणार आहेत. मात्र, दौंड रेल्वे स्थानकावर उतरवून घेतलेल्या प्रवाशाला पुण्यातील नायडू रुग्णालयात पाठवण्यासाठी १०८ क्रमांकाची रुग्णवाहिका मागविताना या कक्षाकडून अपेक्षित प्रतिसाद मिळाला नाही.
...
१०८ क्रमांकाची रुग्णवाहिका उपलब्ध होण्यासाठी रेल्वे प्रशासन व रेल्वेच्या डॉक्टरांनी माझ्याशी संपर्क केला होता. १०८ क्रमांकाच्या रुग्णवाहिकांवर उपजिल्हा रुग्णालयाचे थेट नियंत्रण नाही. ही घटना कळाल्यानंतर मी ताबडतोब रुग्णवाहिका पुरवणाऱ्या जिल्हा समन्वयकांशी संपर्क साधून रुग्णवाहिका उपलब्ध करून दिली, तसेच आमच्या रुग्णवाहिकेचा चालकदेखील त्यांच्यासोबत दिला. यापुढे संशयित रुग्ण आढळल्यास रेल्वे प्रशासनाने पॅनिक न होता त्या रुग्णाला थेट दौंड उपजिल्हा रुग्णालयात आणावे. आम्ही त्या रुग्णाला स्वतंत्र कक्षात ठेवून, त्यानंतर पुणे येथे घेऊन जाऊ.
- डॉ. संग्राम डांगे, अधीक्षक, दौंड उपजिल्हा रुग्णालय