म. टा. प्रतिनिधी, पुणे
छत्रपती शाहू महाराज संशोधन, प्रशिक्षण व मानव विकास संस्थेतर्फे (सारथी) मराठा, कुणबी, कुणबी-मराठा, मराठा-कुणबी समाजातील विद्यार्थ्यांसाठी बँकिंग परीक्षेसाठी मोफत प्रशिक्षण दिले जाणार आहे. 'इन्स्टिट्यूट ऑफ बँकिंग पर्सोनेल सिलेक्शन' अर्थात, आयबीपीएसतर्फे बँकांमध्ये अधिकारी; तसेच कर्मचारी पदासाठी ऑक्टोबर-नोव्हेंबरमध्ये परीक्षा घेण्यात येणार आहे. याच्या पूर्वतयारीसाठी 'सारथी'तर्फे पुणे, मुंबई, नवी मुंबई, अमरावती, नगर, औरंगाबाद, जळगाव, कोल्हापूर, लातूर, नागपूर, रत्नागिरी, सांगली, सातारा, सिंधुदुर्ग, सोलापूर, बीड, बुलढाणा व वाशीम या ठिकाणी मोफत मार्गदर्शन वर्ग घेतले जाणार आहेत.
सिंधुदुर्ग, रत्नागिरी, सांगली, सातारा व कोल्हापूर या केंद्रांसाठी अर्ज करण्याची अंतिम तारीख २७ ऑगस्ट आहे. उर्वरित केंद्रांसाठी २१ ऑगस्टपर्यंत ऑनलाइन पद्धतीने अर्ज करता येतील. अर्ज केवळ ऑनलाइन पद्धतीनेच करता येतील. अर्जासाठी व अधिक माहितीसाठी www.sarthi-maharashtragov.in ही वेबसाइट पाहावी, असे आवाहन सारथीचे व्यवस्थापकीय संचालक डी. आर. परिहार यांनी केले आहे.