म. टा.प्रतिनिधी, हडपसर
आदिवासी विद्यार्थी शिक्षणासाठी सरकार कोट्यवधी रुपयांची तरतूद करते; मात्र प्रत्यक्षात आदिवासी विद्यार्थ्यांना या सुविधा मिळत नाहीत. हे प्रश्न सोडविण्यासाठी विद्यार्थ्यांसह सोलापूर रोडवर रास्ता रोको आंदोलन करण्याचा इशारा शिवसेनेचे शहरप्रमुख महादेव बाबर यांनी दिला.
आदिवासी वसतिगृहातील विद्यार्थ्यांचा मंगळवारी आंदोलनाचा सातवा दिवस आहे. आंदोलनातील तीन विद्यार्थ्यांना हॉस्पिटलमध्ये उपचारासाठी दाखल करण्यात आले आहे. विद्यार्थ्यांच्या मागण्या मान्य केल्याचे आश्वासन लेखी न दिल्याने आंदोलन चिघळले आहे. सोमवारी आदिवासी विभागाचे उपायुक्त एम. ए. शेख यांनी भेट दिली. तसेच, उपोषण मागे घेण्याची विनंती केली. मात्र, लेखी आश्वासन देण्यास नकार दिल्याने आंदोलन पुढे चालू ठेवण्यात आले आहे. नियमानुसार जेवण व शालेय साहित्य, संगणक सुविधा, डीबीटी भत्ता व वसतिगृह स्वच्छतेसाठी सफाईकामगार व विद्यार्थ्यांना त्रास देणारे व विद्यार्थ्यांच्या मागण्या सरकारपर्यंत न पोहचवणाऱ्या गृहपालाला निलंबन करण्याची मागणी विद्यार्थ्यांनी केली आहे. मंगळवारी बाबर यांनी विद्यार्थ्यांची भेट घेऊन आंदोलनाला पाठिंबा दिला. या वेळी अमोल हरपळे, समीर तुपे, राम खोमणे, विशाल ढोरे आदी उपस्थित होते. रास्ता रोको आंदोलन करण्याचे निवेदन हडपसर पोलिस ठाण्याला देण्यात आले आहे, असे बाबर यांनी सांगितले.
वसतिगृह परिसरात घाणीचे साम्राज्य
वसतिगृहात नाला नसल्याने सांडपाणी उघड्यावर सोडल्याने दलदल निर्माण होऊन दुर्गंधी सुटली आहे. यामुळे आदिवासी विद्यार्थ्यांच्या जीविताला धोका निर्माण झाला आहे. याकडे संबंधित विभागाचे लक्ष नाही, या परिसराची पाहणी महादेव बाबर व सहकाऱ्यांनी केली.