म. टा. प्रतिनिधी, पुणे
महापालिकेतील डॉ. बाबासाहेब आंबेडकर सभागृहात वृक्षतोडीबाबतच्या आक्षेपावर अतिरिक्त आयुक्तांच्या सुनावणी दरम्यान गोंधळ झाल्यामुळे ती पुढे ढकलण्याचा निर्णय घेण्यात आला. सुनावणी सर्वच तक्रारदारांसमोर झाली पाहिजे, या मागणीवरून झालेल्या गोंधळात एका तक्रारदाराने स्वत:च्या तोंडावर फटकेही मारून घेतले. त्यामुळे सुनावणीसाठी आलेले अधिकारी तेथून निघून गेल्याने सुनावणी पुढे ढकलण्यात आली.
वृक्ष तोडीविषयी आक्षेप नोंदविण्यात आले असून त्यासाठीची नियोजित सुनावणी सोमवारी ठरली होती. महापालिकेतील डॉ. बाबासाहेब आंबेडकर सभागृहात ही सुनावणी दुपारी सुरू होणार होती. सर्व तक्रारदार सभागृहात उपस्थित होते. महापालिका आयुक्त सौरभ राव हे सध्या परदेश दौऱ्यावर असल्यामुळे त्यांच्याऐवजी अतिरिक्त आयुक्त राजेंद्र निंबाळकर यांनी सुनावणी सुरू केली. सर्व तक्रारदारांची एकत्रित सुनावणी घेता येणार नसून एकेका तक्रारदाराने सुनावणीसाठी उपस्थित राहावे, अशी सूचना त्यांनी केली. या वेळी उपस्थित विविध संस्थांच्या प्रतिनिधींनी सुनावनी ही सर्वांसमोरच घेण्यात यावी, अशी आग्रही भूमिका घेतली.
निंबाळकर हे एकत्रित सुनावणी घेता येणार नाही, यावर ठाम राहिले. त्यामुळे उपस्थित प्रतिनिधींमधील एका प्रतिनिधीने स्वत:च्या तोंडावर फटके मारण्यास सुरुवात केल्याने एकच गोंधळ उडाला. यामुळे निंबाळकर यांच्यासह सर्व अधिकारी तेथून निघून गेले. महापालिकेच्या वृक्ष प्राधिकरणाला ही सुनावणीच घ्यायची नसल्याने त्यांनी एकत्रित न घेण्याची भूमिका घेतली, असा दावा तक्रार करणाऱ्या प्रतिनिधींनी केला. तसेच, वृक्ष प्राधिकरण समितीच्या पटलावर मोठ्या प्रमाणात वृक्षतोडीचे प्रस्ताव असून सुनावणी पूर्ण होत नाहीत, तोपर्यंत वृक्षतोडीचे प्रस्ताव मंजूर करण्यात येऊ नये, अशी मागणीही त्यांनी केली. 'सुनावणी घेण्याचा अधिकार मला असून ती कशी घ्यावी याचाही अधिकार माझाच आहे. वैयक्तिक सुनावणी होऊ नये यासाठी सर्वांसमोर गोंधळ घालण्याचा प्रयत्न करण्यात आला', अशी प्रतिक्रिया अतिरिक्त आयुक्त निंबाळकर यांनी व्यक्त केली.
.......