म. टा. प्रतिनिधी, पिंपरी
जागेच्या वादातून टोळक्याने गोदामात जाऊन कामगारांना लाकडी दांडके, पाइपने मारहाण करून १५ ते २० लाख रुपयांचे पेपर रद्दीचे गठ्ठे व रोकड लंपास केली. कुदळवाडी येथे गुरुवारी (दि. १९) रात्री दहाच्या सुमारास हा प्रकार घडला असून, या प्रकरणी निगडी पोलिस ठाण्यात दरोड्याचा गुन्हा दाखल करण्यात आलेला आहे.
जकरिया उमर मेमन (५६, रा. बिबेवाडी) यांनी फिर्याद दिली आहे; तर इक्बाल हुसेन, अकबर हुसेन, हसन हुसेन, महंमद खान, गणेश मोरे आणि इतर चार पाच जणांविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, कुदळवाडी येथे गुडलक स्क्रॅप नावाचे गोदाम आहे. या गोदामाच्या जागेवरून मेमन आणि हुसेन यांच्यात वाद सुरू आहेत. या वादातूनच गुरुवारी रात्री हुसेन हे जमावासह गोदामात आले. गोदामात काम करत असलेल्या कामगारांना लाकडी दांडके, लोखंडी पाइप, रॉड याने मारहाण केली. तसेच गोदामातील १५ ते २० लाख रुपयांचे रद्दीचे गठ्ठे जबरदस्तीने नेले. जमा झालेली दोन लाख रुपयांची रोकडही नेली. या प्रकरणी मेमन यांनी तक्रार दिल्यानंतर गुन्हा दाखल करण्यात आला आहे. निगडी पोलिस तपास करीत आहेत.
-------------