म. टा. प्रतिनिधी, पुणे
वडगाव बुद्रुक परिसरातील नागरिकांची परदेशात सहलीच्या आमिषाने २० लाख ८५ हजारांची फसवणूक केल्याचा प्रकार उघडकीस आला आहे. या प्रकरणी कोथरूड परिसरातील टूर्स अँड ट्रॅव्हल्स कंपनीच्या विरोधात अलंकार पोलिस ठाण्यात गुन्हा दाखल करण्यात आला.
याबाबत विश्वजित एनकीकर (वय ३६, रा. वडगाव बुद्रुक) यांनी तक्रार दिली आहे. त्यानुसार रिस्पाइट इंटरनॅशनल हॉलिडेजचे संचालक, व्यवस्थापक व विपणन व्यवस्थापकाच्या विरोधात गुन्हा दाखल करण्यात आला. पोलिसांनी दिलेल्या माहितीनुसार, एनकीकर आणि त्यांचे जवळच्या व्यक्तींना परदेशात पर्यटनासाठी जायचे होते. त्यासाठी ते टूर्स अँड ट्रॅव्हल्स कंपनीची माहिती घेत होते. त्यांना आरोपींच्या कंपनीबाबत समजले. त्यानंतर एनकीकर यांच्यासह २० जणांनी कोथरूड भागातील रिस्पाइट इंटरनॅशनल हॉलिडेजच्या कार्यालयात संपर्क साधला. एनकीकर यांच्यासह २० जणांनी परदेश सहलीसाठी दोन वर्षांपूर्वी नोंदणी केली होती. त्यानंतर एनकीकर यांच्यासह २० जणांनी एकूण मिळून २० लाख ८५ हजार रुपये जमा केले. कंपनीकडून त्यांना परदेशत घेऊन जाऊन वेगवेगळ्या सुविधा पुरविण्याचे आमिष दाखविण्यात आले; पण ठरल्या वेळी त्यांना कंपनीकडून परदेशी सहलीचे आयोजन करण्यात आले नाही. त्यांनी कंपनीशी वारंवार संपर्क केला. पैसे परत मिळावेत; म्हणूनही त्यांच्याकडे मागणी केली. त्यांना पैसेही परत मिळाले नाहीत आणि त्यांना सहलीलाही घेऊन जाण्यात आले नाही. फसवणूक झाल्याचे लक्षात आल्यानंतर एनकीकर यांनी पोलिसांकडे तक्रार दिली. त्यानुसार अलंकार पोलिस ठाण्यात गुन्हा दाखल करण्यात आला आहे. या प्रकरणी सहायक पोलिस निरीक्षक शिवप्रसाद खोसे तपास करीत आहेत.