गोमांस विकणाऱ्या दोघांना कोठडी

दौंड : दौंड तालुक्यातील कासुर्डी टोलनाका परिसरात असणाऱ्या हॉटेल दिल्ली दरबार येथे विक्रीसाठी नेत असलेले गोमांस पोलिसांनी पकडले आहे. या प्रकरणी गाडी चालक व हॉटेल मालकाला यवत पोलिसांनी अटक केली. आरोपींना दौंड येथील न्यायालयापुढे उभे केले असता त्यांना दोन दिवसांची पोलिस कोठडी सुनावण्यात आली, अशी माहिती पोलिस उपनिरीक्षक अजय गोरड यांनी दिली.

गाडी चालक मल्हारी स्वामी जाधव (वय ३३, रा. नगरमोरी, दौंड), हॉटेल मालक सुरेश वासू तंडन (वय ३८, रा. कासुर्डी, ता. दौंड) अशी अटक केलेल्यांची नावे आहेत. २३ ऑगस्टला जाधव हा एमएच ४२ एच २७०८ या क्रमांकाच्या गाडीतून सायंकाळच्या सुमारास विनापरवाना ५० किलो तुकडे केलेले गोमांस विक्रीसाठी नेत होता. त्या वेळी पुणे-सोलापूर महामार्गावर चौफुला येथे पोलिसांनी त्याला पकडले. हॉटेल दिल्ली दरबार येथे गोमांस नेत असल्याची कबुली जाधव याने दिली. त्यानुसार पोलिसांनी जाधव आणि हॉटेल मालकावर कारवाई केली.