म. टा. प्रतिनिधी, पुणे
देशातील स्मार्ट सिटींसाठी 'स्मार्ट सिटी कौन्सिल इंडिया'तर्फे घेण्यात आलेल्या स्पर्धेत 'पुणे स्मार्ट सिटी डेव्हलपमेंट कॉर्पोरेशन'ला (पीएससीडीसी) दोन विभागांत पुरस्कार जाहीर झाला आहे. वाहतूक विभागात स्मार्ट सिटीच्या 'ई-बस' प्रकल्पाची निवड करण्यात आली असून, नागरिक सेवा विभागात 'पीएमसी केअर' प्रकल्पाला पुरस्कार मिळणार आहे.
'स्मार्ट सिटी कौन्सिल'ने स्मार्ट सिटी अंतर्गत निवडण्यात आलेल्या सर्व शहरांमध्ये नागरिकांना सर्वाधिक लाभ मिळणाऱ्या प्रकल्पांसाठी स्पर्धा घेतली होती. या स्पर्धेतील दोन विभागांमध्ये पुणे स्मार्ट सिटीचे प्रकल्प अव्वल ठरले आहेत. पुणे स्मार्ट सिटीने शहरात सार्वजनिक बससेवा पुरविणाऱ्या पुणे महानगर परिवहन महामंडळाला (पीएमपी) बॅटरीवरील 'स्मार्ट ई-बस' उपलब्ध करून दिल्या आहेत. शहराच्या अनेक भागांत सध्या या ई-बस धावत असून, त्याला प्रवाशांकडून उत्तम प्रतिसाद मिळत आहे. प्रदूषणमुक्त प्रवासाची संधी देणाऱ्या या प्रकल्पाची निवड झाली. तसेच, नागरिकांच्या तक्रारी सोडविण्यासाठी पालिकेतर्फे राबविण्यात येणाऱ्या पीएमसी केअरची निवड करण्यात आली आहे. येत्या २५ सप्टेंबरला बेंगळुरूमध्ये या पुरस्कारांचे वितरण केले जाणार आहे.
................