पुणे : कात्रजकडून कोंढव्याच्या दिशेने जाणाऱ्या ट्रकखाली दुचाकी येऊन झालेल्या अपघातात दुचाकीवरील दोन व्यक्ती गंभीर जखमी झाल्याची घटना मंगळवारी रात्री घडली. यलप्पा तोलिकोटे आणि त्याचा सहकारी अपघातात जखमी झाला आहे. एकाचा पाय निकामी झाला असून, दुसरा गंभीर जखमी आहे.
कात्रज-कोंढवा रस्त्यावर शिवशंभूनगर येथून कर्नाटक पासिंगचा ट्रक जात होता. त्याचवेळी तेथून दोघे जण दुचाकीवरून जात असताना झालेल्या विचित्र अपघातात दुचाकीवरील दोघे ट्रकच्या डाव्या बाजूच्या मागच्या चाकाखाली सापडले. स्थानिकांनी दोघांना बाहेर काढण्याचा प्रयत्न केला. मात्र, त्यांना यश न आल्याने अग्निशमन दलाशी संपर्क साधण्यात आला. अग्निशमनच्या संजय रामटेके, जयवंत तळेगण, गणेश भंडारे, संदीप घडशी, पंकज इंगवले या कर्मचाऱ्यांनी दोघांची सुटका केली.
दरम्यान, 'कोणाच्या चुकीमुळे अपघात झाला, हे अद्याप सिद्ध होऊ शकले नसून, ट्रकचालकाकडे चौकशी केली आहे. अद्याप गुन्हा दाखल झालेला नाही. दुचाकीचे थोडे नुकसान झाले आहे,' अशी माहिती पोलिस उपनिरीक्षक समाधान मचाले यांनी दिली.
------------