म. टा. प्रतिनिधी, पुणे
'राज्यात निर्माण झालेल्या पूरस्थितीमुळे सुमारे दोन लाख हेक्टर क्षेत्रावरील शेतीचे नुकसान झाले आहे. त्यामध्ये फळबागांचा समावेश असून, नुकसान झालेल्या सर्व फळबागांच्या पुनर्उभारणीसाठी 'पांडुरंग फुंडकर फळबाग योजने'अंतर्गत आर्थिक मदत दिली जाणार आहे', अशी माहिती राज्याचे फलोत्पादन आणि रोजगार हमी योजना खात्याचे मंत्री जयदत्त क्षीरसागर यांनी दिली.
रोजगार हमी योजना आणि फलोत्पादन विभागाची राज्यस्तरीय बैठक कृषी आयुक्त कार्यालयात घेण्यात आली. त्यानंतर पत्रकार परिषदेत त्यांनी ही माहिती दिली. या वेळी कृषी आयुक्त सुहास दिवसे उपस्थित होते. क्षीरसागर म्हणाले, 'राज्यात निर्माण झालेल्या पूरस्थितीमुळे प्राथमिक अंदाजानुसार सुमारे दोन लाख हेक्टर क्षेत्रावरील शेतीचे नुकसान झाले आहे. त्यामध्ये फळबागांचा समावेश आहे. या फळबागांची पुन्हा उभारणी करण्यासाठी राज्य सरकारकडून आर्थिक मदत देण्यात येणार आहे. फळबागांमध्ये द्राक्ष पिकाचा समावेश करण्यात आला आहे.'
'ठिबक सिंचन पद्धतीचा अवलंब शेतकऱ्यांनी करण्यासाठी ठिबक सिंचनावरील शेतीला ८० टक्के सबसिडी देण्याचा निर्णय राज्य सरकारने घेतला असून, त्याचा अध्यादेश काढण्यात आला आहे. त्यामध्ये नक्षलग्रस्त तालुके, कायम दुष्काळी तालुके आणि पश्चिम महाराष्ट्रातील ७७ तालुक्यांचा समावेश आहे', असे क्षीरसागर यांनी स्पष्ट केले.
'राज्यात सुरू असलेली 'मागेल त्याला शेततळे' ही योजना अधिक प्रभावीपणे राबवली जाणार आहे. उद्दिष्ट पूर्ण झाले असले, तरीही शेततळ्यांचे प्रस्ताव मंजूर केले जाणार आहेत. शेततळ्यांच्या अस्तरीकरणासाठी प्रोत्साहन दिले जाणार आहे', असे क्षीरसागर यांनी सांगितले.
'काजू उत्पादनाबाबत नेमलेल्या समितीने अहवाल दिला असून, तो अहवाल राज्य सरकारने स्वीकारला आहे. या अहवालानुसार कोकणात काजू उत्पादन वाढीसाठी प्रयत्न होणार आहेत', अशी माहिती क्षीरसागर यांनी दिली.
.........
अतिवृष्टीमुळे बाधित झालेले राज्यातील क्षेत्र (हेक्टरमध्ये)
विभाग क्षेत्र बाधित तालुके
कोकण ४१२०८ अलिबाग, उरण, कल्याण, अंबरनाथ, कणकवली, वैभववाडी, सावंतवाडी, दोडामार्ग, वेंगुर्ला, कुडाळ
नाशिक २३५५७ धुळे, साक्री, शिंदखेडा, सिन्नर, निफाड, त्र्यंबकेश्वर, इगतपुरी, नाशिक, दिंडोरी, सटाणा, कळवण, देवळा, पेठ, सुरगाणा
कोल्हापूर ११२२९७ सातारा, कोरेगाव, कराड, पाटण, वाई, जावळी, महाबळेश्वर, खंडाळा, फलटण, मिरज, वाळवा, शिराळा, पलूस, करवीर, हातकणंगले, राधानगरी, गगनबावडा, गडहिंग्लज, आजरा, चंदगड, भुदरगड
पुणे १२८९१ जुन्नर, मावळ, खेड, आंबेगाव, भोर, वेल्हा, मुळशी, पुरंदर
सोलापूर १०८२० दक्षिण सोलापूर, पंढरपूर, मंगळवेढा, माढा, मोहोळ, माळशिरस
नगर ६४४ श्रीरामपूर
नागपूर ७७ हिंगणघाट, आर्वी, समुद्रपूर