म. टा. वृत्तसेवा, इंदापूर
नादुरुस्त अवस्थेत उभ्या असलेल्या टेम्पोला ओव्हरटेक करताना इंडिगोच्या कारचालकाने अचानक ब्रेक दाबल्याने पाठीमागून येणाऱ्या शिवशाही बसचालकानेही अचानक ब्रेक दाबला. या वेळी ठाणे-उस्मानाबाद एसटी बस पुणे-नांदेड शिवशाही बसवर आदळली. या वेळी झालेल्या अपघातात २४ प्रवासी जखमी झाल्याची घटना घडली. सदरचा अपघात गुरुवारी दुपारी दोन वाजण्याच्या सुमारास पुणे-सोलापूर महामार्गावरील मदनवाडी गावाच्या हद्दीत घडला. प्रवाशांचे नशीब बलवत्तर असल्यामुळे बस उजनीच्या पाण्यात पडण्यापासून थोडक्यात बचावली.
भिगवणपासून एक किमी अंतरावर हा अपघात घडला असून, यात दोन्ही वाहनांतील प्रवासी जखमी झाले. पुणे-सोलापूर महामार्गावर पुण्याकडून सोलापूरकडे जाणाऱ्या लेनवर टेम्पो नादुरुस्त झाल्यामुळे उभा होता. त्याच वेळी एक इंडिगो गाडीच्या (एमएच ०२ पीए ८१७७) चालकाने अचानक ब्रेक लावला. त्याच वेळी सोलापूरकडे जाणाऱ्या शिवशाही बसने (एमएच १४ जीयू ०६४५) ब्रेक लावण्याच्या प्रयत्नात कारला धडक दिली. त्याच वेळी पुण्याहून सोलापूरकडे जाणारी ठाणे-उस्मानाबाद बस (एमएच १४ बीटी ४५७६) शिवशाहीवर जोरात आदळली. या बसमध्ये सोलापूर, उस्मानाबाद, बार्शी, पुणे या जिल्ह्यांतील २४ प्रवासी डोक्याला, डोळ्यांना आणि छातीला मार लागल्याने जखमी झाले आहेत. नांदेड एसटी बसमधील प्रवाशांनाही किरकोळ मार लागला.
अपघात झालेल्या ठिकाणी उजनीचा पूल आहे. त्याखाली मोठ्या प्रमाणावर पाणी आहे. मात्र, बस ड्रायव्हरचे प्रसंगावधान आणि प्रवाशांचे नशीब बलवत्तर असल्यामुळे पुढील अनर्थ टळला. अपघाताची माहिती मिळताच भिगवण पोलिस ठाण्याचे हवालदार शिवाजी निकम; तसेच पोलिस कर्मचारी यांनी मदतीला पोलिस पथक पाठवून, जखमींना भिगवण येथील खासगी दवाखान्यात उपचारासाठी नेले. या वेळी डॉ. राजन सोनवणे यांच्यामुळे जखमींना तातडीने मदत मिळाली.
महामार्ग पोलिसांचे दुर्लक्ष
ज्या ठिकाणी अपघात झाला, त्या ठिकाणी महामार्ग प्रशासनाकडून कोणताही सूचनाफलक लावण्यात आला नव्हता. अनेकदा महामार्गावर नादुरुस्त वाहने; तसेच इतरही वाहने रस्त्यावर लावली जातात. मात्र, महामार्ग पोलिसांच्या दुर्लक्षामुळे अशा अपघातांना सामोरे जावे लागत असल्याची भावना नागरिकांनी व्यक्त केली.
पुणे-सोलापूर महामार्गावर भिगवणजवळ झालेल्या दोन एसटी बसच्या विचित्र अपघातात २४ प्रवासी जखमी झाले. यामुळे काही काळ वाहतूक खोळंबली, तर यात बसचे नुकसान झाले.
छाया : नितीन चितळकर