पुणे : शहरातील विविध भागांतील पार्किंगमधून अॅक्टिव्हा दुचाकी चोरणाऱ्या तरुणाला खडक पोलिसांनी अटक केली आहे. त्याच्याकडून पाच गुन्हे उघडकीस आले आहेत.
आकाश उर्फ कल्लू संजय भोरे (वय २१, रा. गंज पेठ) असे अटक केलेल्याचे नाव आहे. शहरात दररोज चार ते पाच वाहने चोरीला जात आहेत. त्यामुळे वाहनचोरी करणाऱ्या गुन्हेगारांना जेरबंद करण्याचे आदेश वरिष्ठांकडून देण्यात आलेले आहेत. काही दिवसांपूर्वी महात्मा फुले स्मारकाजवळून एक अॅक्टिव्हा दुचाकी चोरीला गेली होती. ही दुचाकी चोरणारी व्यक्ती ही कासेवाडी परिसरात असल्याचे पोलिसांना समजले. त्यानुसार वरिष्ठ निरीक्षक भरत जाधव, पोलिस निरीक्षक उत्तम चक्रे आणि सहायक निरीक्षक उमाजी राठोड यांच्या पथकाने बीएसएनएल ऑफिसजवळ भोरे याला सापळा रचून अटक केली. त्याला दुचाकीबाबत विचारपूस केली असता त्याने उडवाउडवीची उत्तरे दिली. त्याला ताब्यात घेऊन सखोल तपास केल्यानंतर त्याने दुचाकीचोरीची कबुली दिली. त्याच्याकडून खडक येथील तीन व दत्तवाडी आणि फरासखाना येथील प्रत्येकी एक असे पाच गुन्हे उघडकीस आले आहेत. आकाश भोरे दिवसा रिक्षा चालवतो. तर, रात्री दुचाकी चोरत होता. चोरीच्या गाड्यांवरून तो फिरत असे, असे चौकशीत समोर आले आहे.