पर्यावरण अहवाल सादर, रेल्वे प्रवासी वाढले, पण एसटीत घटले
म. टा. प्रतिनिधी, पुणे
संपूर्ण देशामध्येच वाहन उद्योग क्षेत्रात्रील मंदीचा परिणाम शहरातही स्पष्टपणे दिसून आला असून, गेल्या सात वर्षांमध्ये प्रथमच खासगी वाहनांची संख्या घटल्याचे समोर आले आहे. खासगी दुचाकी आणि चारचाकी वाहनांची संख्या घटली असतानाच, सार्वजनिक वाहनांच्या संख्येत (रिक्षा/टॅक्सी/बस) वाढ झाल्याचे चित्र शहरात पाहायला मिळाले आहे. त्यामुळे, २०१२ पासून शहरात वाढणाऱ्या खासगी वाहन संख्येला प्रथमच 'ब्रेक' लागला आहे.
महापालिकेच्या पर्यावरण अहवालातून खासगी वाहनसंख्येत झालेली घट निदर्शनास आली आहे. महापालिका आयुक्त सौरभ राव यांनी २०१८-१९ चा पर्यावरण सद्यस्थिती अहवाल महापौर मुक्ता टिळक यांच्याकडे सुपूर्त केला. या अहवालात शहरातील पर्यावरणाशी संबंधित सर्वच घटकांचा आढावा घेण्यात आला असून, वाहनसंख्येचे सविस्तर आलेखच मांडण्यात आले आहेत. गेल्यावर्षी शहरात दोन लाख ८९ हजार नव्या वाहनांची नोंद झाली होती. हेच प्रमाण यंदा २ लाख ६१ हजारांपर्यंत घसरले आहे. गेल्यावर्षीच्या तुलनेत वाहन नोंदणीचे प्रमाण २८ हजारांनी घटले आहे. खासगी दुचाकी आणि चारचाकी वाहनांच्या नोंदणीत लक्षणीय घट झाल्याचे दिसून येत आहे. दरवर्षी सरासरी दोन लाख नव्या दुचाकींची भर पुण्याच्या रस्त्यांवर पडत होती; पण यंदा हे प्रमाण एक लाख ७६ हजारांपर्यंत मर्यादित राहिले आहे. तर, सरासरी ५० हजार चारचाकी वाहने दरवर्षी नव्याने पुण्याच्या रस्त्यांवरील कोंडीत आणखी भर घालत होती. या प्रमाणातही अल्पशी घट झाली आहे. यावर्षी ४७ हजार चारचाकींची नोंद झाली आहे. गेल्या वर्षी हेच प्रमाण ५६ हजार होते.
\Bसार्वजनिक वाहनांत वाढ
\Bदोन वर्षांपूर्वी रिक्षांसाठीचे परवाने खुले करण्याचा निर्णय घेण्यात आला होता. त्यानंतर, सातत्याने रिक्षांची संख्या वाढत आहे. गेल्या वर्षभरात तर रिक्षांच्या संख्येत १६ हजारांनी वाढ झाली आहे. तसेच, टॅक्सी/कॅबच्या संख्येतही लक्षणीय वाढ झाली आहे. २०१६ मध्ये संपूर्ण शहरातील टॅक्सी/कॅबची संख्या जेमतेम १० हजारांच्या दरम्यान होती. त्यात गेल्या तीन वर्षांत तिप्पट वाढ झाली असून, सध्या पुण्याच्या रस्त्यांवर ३५ हजार टॅक्सी/कॅब फिरत आहेत.
.............
चौकट १
विमान प्रवाशांमध्ये वाढ
शहरातून देशांतर्गत विमान प्रवास करणाऱ्या प्रवाशांच्या संख्येतील वाढ कायम राहिली आहे. २०१८-१९ या वर्षात पुणे विमानतळावरून तब्बल ८८ लाख प्रवाशांनी देशांतर्गत, तर अडीच लाख प्रवाशांनी आंतरदेशीय प्रवास केला. देशांतर्गत विमानउड्डाणआंच्या संख्येतही वाढ झाली असून, आंतरराष्ट्रीय विमानांची संख्या घटल्याने या उड्डाणांमध्ये मात्र घट झाली आहे.
.................
चौकट २
रेल्वे प्रवाशांत वाढ, एसटीत घट
गेल्या वर्षीच्या तुलनेत रेल्वेने प्रवास करणाऱ्या प्रवाशांमध्ये अल्पशी वाढ झाली आहे. पुणे रेल्वे स्थानकावरून संपूर्ण वर्षभरात सात कोटी ८१ लाख प्रवाशांनी प्रवास केल्याचे दिसून येत आहे. गेल्या वर्षीच्या तुलनेत त्यात चार लाख प्रवाशांची भर पडली आहे. मात्र, एसटीच्या प्रवासी संख्येत होणारी घट कायम आहे. दहा कोटी ६८ लाख प्रवाशांवरून एसटीची प्रवासीसंख्या १० कोटी २३ लाखांपर्यंत कमी झाल्याची आकडेवारी समोर आली आहे.
...................