म. टा. प्रतिनिधी, पिंपरी
पार्किंगमध्ये जागा नाही, पुढच्या पार्किंगमध्ये दुचाकी पार्क करा, असे सांगणाऱ्या पोलिस कर्मचाऱ्याला दुचाकीस्वाराने मारहाण केली. सोमवारी (२५ नोव्हेंबर) सकाळी आळंदीमधील पीसीएमसी चौकात ही घटना घडली. हवालदार बापूराव भीमराव नळकांडे यांनी या प्रकरणी आळंदी पोलिस ठाण्यात फिर्याद दिली.
माणिक संभाजी करात (वय २६, रा. आळंदी, ता. खेड) याच्या विरोधात गुन्हा दाखल करण्यात आला आहे.
हवालदार बापूराव नळकांडे सोमवारी सकाळी आळंदीमधील पीसीएमसी चौकात ड्युटीवर होते. त्या वेळी माणिक नंबर नसलेली मोटारसायकल भरधाव वेगात घेऊन आला. नळकांडे यांनी दुचाकीस्वाराला 'पार्किंगमध्ये जागा नाही, पुढच्या पार्किंगमध्ये गाडी लाव,' असे सांगितले. माणिकने नळकांडे यांच्या पायावरून दुचाकी पुढे नेली. त्या वेळी पोलिस नाईक शिर्के यांनीही दुचाकीस्वाराला पार्किंगसाठी जागा नसल्याचे समजावून सांगितले. यावरून आरोपी माणिकने हवालदार नळकांडे यांची गचांडी पकडून त्यांना मारहाण करून सरकारी कामात अडथळा आणला. आळंदी पोलिस तपास करीत आहेत.
--
म. टा. प्रतिनिधी, पिंपरी
पीएमपीच्या धडकेत पादचारी तरुणाचा मृत्यू झाला. पुणे-नाशिक रोडवर खेड तालुक्यातील मेदनकरवाडी येथे ही घटना घडली. नितीन राजेंद्र पाटील (वय २४, रा. कुरुळी, ता. खेड), असे मृत्यू झालेल्या तरुणाचे नाव आहे. या प्रकरणी हवालदार नामदेव भगवान जाधव यांनी चाकण पोलिस ठाण्यात फिर्याद दिली आहे. त्यानुसार, संतोष बाजीराव पवार (वय ३५, रा. हजारे वस्ती, मोशी) या बसचालकाविरोधात गुन्हा दाखल करण्यात आला आहे.