ऑनलाइन फसवणुकीचे प्रकार सुरूच
म टा प्रतिनिधी, पुणेवेबसाइटवर दुचाकी विक्रीची जाहिरात देऊन १ लाख ४८ हजार रुपयांचा गंडा घातल्याचा प्रकार समोर आला आहे...
म. टा. प्रतिनिधी, पुणे
वेबसाइटवर दुचाकी विक्रीची जाहिरात देऊन १ लाख ४८ हजार रुपयांचा गंडा घातल्याचा प्रकार समोर आला आहे. याबाबत माधव महाबळेश्वरकर (रा. वडगाव बुद्रुक, धायरी) यांनी सिंहगड पोलिस स्टेशनमध्ये तक्रार दिली आहे. त्यावरून पोलिसांनी अज्ञात व्यक्तीच्या विरोधात गुन्हा दाखल करण्यात आला आहे.
एका वेबसाइटवर अज्ञात व्यक्तीने दुचाकी विक्री करण्याबाबतची जाहिरात दिली होती. ही जाहिरात पाहून तक्रारदार महाबळेश्वरकर यांनी या अज्ञात व्यक्तीच्या मोबाइलवर संपर्क साधला. दुचाकी खरेदी करण्याचा व्यवहार ठरविण्यात आला. त्यानंतर अज्ञाताने वेगवेगळी कारणे सांगून महाबळेश्वरकर यांना ऑनलाइन पद्धतीने पैसे भरण्यास सांगितले. दुचाकी रेल्वेने पाठविली आहे, असे त्याने महाबळेश्वरकर यांना सांगितले. आपली फसवणूक झाल्याचे लक्षात आल्यानंतर त्यांनी तातडीने पोलिसांकडे तक्रार दिली. गुन्हे शाखेतील पोलिस निरीक्षक सुनील ताकवले तपास करत आहेत.
\Bयुवकाची फसवणूक\B
बँक आधिकारी असल्याची बतावणी करून युवकाची फसवणूक करण्यात आली. उमरकासीम चिक्कळी (वय २६, रा.चंदननगर) यांनी याबाबत चंदननगर पोलिस स्टेशनमध्ये तक्रार दिली आहे. चिक्कळी यांच्या मोबाइल क्रमांकावर अज्ञाताने संपर्क साधून बँक आधिकारी असल्याची बतावणी केली. तुमच्या क्रेडिट कार्डची सेवा बंद करण्यात येणार असून, माहिती अद्ययावत करण्याचे काम सुरू असल्याचे सांगितले. त्यानंतर चिक्कळी यांच्याकडून क्रेडिट कार्डची गोपनीय माहिती घेऊन त्यांच्या खात्यातून परस्पर १९ हजार ९९८ रुपये काढून स्वत:च्या खात्यात जमा केले. पोलिस निरीक्षक प्रकाश पासलकर तपास करत आहेत.