म. टा. प्रतिनिधी, पुणे
विधानसभा निवडणुकीत भारतीय जनता पक्षाच्या उमेदवाराचा पराभव करणाऱ्या उमेदवारांना युवक क्रांती दलाचा (युक्रांद) पाठिंबा राहील, अशी भूमिका अध्यक्ष डॉ.कुमार सप्तर्षी आणि सहकाऱ्यांनी पुण्यात पत्रकार परिषदेत जाहीर केली. या वेळी सुरेश खोपडे, अन्वर राजन, संदीप बर्वे, जांबुवंत मनोहर, सचिन पांडुळे आदी उपस्थित होते. 'भाजप बाहेरचे आयात उमेदवार आणून राजकारण करीत आहे. केवळ प्रतीकांचे, भावनांचे राजकारण करून मुलभूत प्रश्नांकडे दुर्लक्ष करण्यात येत आहे. भाजपा विरोधातील मते एकत्रित व्हावीत, असा आमचा प्रयत्न आहे. भ्रष्टाचार, आयात उमेदवार असे गैरप्रकार न आवडणाऱ्या संघ, भाजपने काही मंडळींना लॉलीपॉप दाखवण्यासाठी सावरकरांना भारतरत्न देण्याचे आश्वासन जाहीरनाम्यात दिले आहे,' असे डॉ. सप्तर्षी यांनी सांगितले. किशोर शिंदे (कोथरूड),अरविंद शिंदे (कसबा), रोहित पवार (कर्जत-जामखेड), सचिन दोडके (खडकवासला), शिवकुमार लाड (वडाळा), युवराज मोहिते (गोरेगाव ), विजयसिंह पंडित (गेवराई), राहुल कलाटे (चिंचवड), बच्चू कडू (अचलपूर) यांना 'युक्रांद'ने पाठिंबा जाहीर केल्याचे डॉ. सप्तर्षी यांनी सांगितले.