कचरा समस्येवर चर्चेतून मार्ग

कचरा डेपोच्या पाहणी दरम्यान महापौरांचे आश्वासन
म. टा. प्रतिनिधी, हडपसर
फुरसुंगी उरुळी देवाची येथील कचरा डेपोला आग लागून सहा दिवस होऊन गेले तरीही ही आग विझलेली नाही. त्यामुळे महापौर मुक्ता टिळक यांनी नगरसेवक आणि गावकऱ्यांसह कचरा डेपोची पाहणी केली. महापौरांनी गावकऱ्यांना चर्चेसाठी बोलावले असता गावकऱ्यांनी महापालिकेत चर्चेला येणार नाही आणि कचरा टाकू देणार नाही, अशी भूमिका घेतली आहे.
अग्निशमन दलाचे जवान दिवसरात्र आग विझवण्याचा प्रयत्न करत आहेत. मात्र, आग अद्यापही विझलेली नाही. त्यामुळे उरुळी देवाची व फुरसुंगीतील ग्रामस्थांनी कचरा टाकू देण्यास विरोध केला आहे. त्यामुळे पुणे शहरात कचऱ्याचे ढीग साचले आहेत. त्यामुळे महापौर मुक्ता टिळक आणि सभागृह नेते श्रीकांत भीमाले यांनी मंगळवारी कचरा डेपोची पाहणी केली. या वेळी नगरसेविका रंजना टिळेकर, उज्ज्वला जंगले, नगरसेवक योगेश ससाणे, संजय घुले, मारुती तुपे, ग्रामस्थ फुरसुंगी सरपंच सीमा कामठे, भगवान भाडळे, रणजित रासकर, तात्या भाडळे, महापालिका घनकचरा विभाग प्रमुख सुरेश जगताप उपस्थित होते.
पुणे शहराच्या चारही बाजूंना नवीन कचरा प्रक्रिया प्रकल्प उभे करण्यात येतील असे आश्वासन देण्यात आले होते. प्रत्यक्षात मात्र, महापालिकेने एकही कचरा प्रकल्प निर्माण केलेला नाही. त्यामुळे ग्रामस्थांमध्ये कमालीचा रोष आहे.
महापौर मुक्ता टिळक म्हणाल्या, ‘कचरा डेपोची आग का विझत नाही हे जाणून घेण्यासाठी पाहणी दौरा केला. कचऱ्याच्या समस्येवर तोडगा काढण्यासाठी महापालिकेत उरळी देवाची आणि फुरसुंगीतील ग्रामस्थांसह बैठक आयोजित केली आहे. त्या वेळी चर्चेद्वारे नक्कीच मार्ग काढण्यात येईल.’
गावकरी भगवान भाडळे म्हणाले, ‘कचरा डेपोला लागलेल्या आगीमुळे उरुळी देवाची गावात धुराचे लोट पसरले आहेत. त्याचा त्रास ग्रामस्थांना होत आहे. शहरात कचरा साठला म्हणून त्रास होत आहे. मग आगीमुळे आम्हालाही त्रास होत आहे.’ कोट
...
कचरा डेपोला लागलेल्या आगीची पाहणी केली आहे. ग्रामस्थांसह महापालिकेत कचऱ्याच्या समस्येवर मार्ग काढण्यासाठी बैठक आयोजित केली आहे. त्यांच्याशी चर्चा करून निश्चित मार्ग काढू.
- मुक्ता टिळक, महापौर
...
मुख्यमंत्री व पालकमंत्री यांनी दिलेला शब्द पाळाला नाही. नऊ महिन्यांचा अवधी घेऊन पर्यायी कचरा डेपो निर्माण करण्यात आले नाहीत. त्याला आम्ही जबाबदार नाही. आमच्या दारात शहरातील कचरा टाकू नका.
- भगवान भाडळे, ग्रामस्थ