कार चालकाला मारहाण करून
पाच लाखांचा मुद्देमाल पळविला
म. टा. प्रतिनिधी, वैजापूर
शिर्डीला जाणाऱ्या कार चालकाला तिघांनी मारहाण करून कार, मोबाइल व रोख रक्कम असा पाच लाख १० हजार २०० रुपयांचा मुद्देमाल पळविला. ही घटना शुक्रवारी मध्यरात्री नागपूर-मुंबई महामार्गावर करंजगाव शिवारात घडली. याप्रकरणी गुन्हा नोंदवण्यात आला आहे.
मुंबई येथील नालासोपरा उपनगरातील रहिवासी प्रसाद प्रकाश झा हे शुक्रवारी रात्री महामार्गाने कारमधून (एम. एच. ४८ एफ ४३८४) शिर्डीला जात होते. नागपूर मुंबई महामार्गावर करंजगाव शिवारात दुसऱ्या कारने ओव्हरटेक करून त्यांची कार थांबवली. त्या कारमधील २५ ते ३० वयोगटातील तिघांनी प्रसाद यांना मारहाण केली. त्यानंतर जीवे मारण्याची धमकी देऊन कार, मोबाइल व रोख रक्कम घेऊन पोबारा केला, अशी फिर्याद देण्यात आली. त्यावरुन अज्ञात व्यक्तींविरुद्ध वैजापूर पोलिस ठाण्यात गुन्हा दाखल करण्यात आला आहे. पुढील तपास पोलिस उपनिरीक्षक राहुल मोरे करीत आहेत.