म. टा. प्रतिनिधी, पुणे
पुण्यातील प्रसिद्ध कथक नृत्यांगना गुरू राजश्री जावडेकर यांच्या रचना डान्स अॅकॅडमी, पुणेचा 'समन्वय-कथक आणि ऋतू' याविषयीचा कार्यक्रम आयोजिण्यात आला होता. एरंडवणे येथील शकुंतला शेट्टी सभागृह येथे पार पडलेल्या या कार्यक्रमात अॅकॅडमीच्या शनिवार पेठ, वानवडी, बाणेर, मगरपट्टा, हांडेवाडी या विविध शाखांमधील शिष्यांनी नृत्यप्रस्तुती केली.
गणेश-वंदनेने सुरुवात झालेल्या या नृत्याप्रस्तुतीमध्ये तीनताल, सरगम, तराणा अशा पारंपरिक रचना संस्थेच्या प्रथम, द्वितीय आणि तृतीय वर्षाच्या मुलींनी सादर केल्या. कार्यक्रमाच्या उत्तरार्धात राजश्रीताई आणि त्यांच्या ज्येष्ठ शिष्यांनी ऋतुचक्रातील ग्रीष्म, वर्षा, हेमंत, शिशिर हे ऋतू आणि कथकमधील तत्कार, सरगम, नायिका, तराणा आदी रचना सादर केल्या. यास जाणकार रसिकांची दाद मिळाली. सर्व ऋतूंची संकल्पना, संरचना राजश्रीताईंची होती. त्यातून मुलींची तयारी दिसून आली.
राजश्रीताईंनी प्रस्तुत केलेल्या सर्व रचनांमध्ये 'वासकसज्जा' ही नायिका उत्तम अभिनयामुळे रसिकांच्या विशेष पसंतीस उतरली. कार्यक्रम उत्तरोत्तर अधिक रंगत गेला.