शहरात उद्यापासून लोककला संमेलन
म. टा. प्रतिनिधी, पिंपरी
'तेरा चौदा तारखेला, रामकृष्ण मोरे प्रेक्षागृहाला...
डोळे भरुन पाहू चला, महाराष्ट्राची ही लोककला...'
असे स्वर पहाटेच्या वेळी पिंपरी-चिंचवडकरांच्या कानी पडताये. औचित्य आहे ते तिसऱ्या लोककला संमेलनाचे. पिंपरी-चिंचवडमध्ये प्रथमच अखिल भारतीय तिसऱ्या मराठी लोककला संमेलनाचे आयोजन करण्यात आले आहे. त्याचे निमंत्रण लोककलावंत असलेले वासुदेवच शहरवासीयांना देत आहेत. संमेलन १३ आणि १४ एप्रिलला चिंचवडच्या प्रा. रामकृष्ण मोरे प्रेक्षागृहात होणार आहे.
पांढरेशुभ्र धोतर, बाराबंदी, जरीकाठी उपरणे, गळ्यात रुद्राक्ष-तुळशीच्या माळा, मोरपिसाची टोपी, हातात टाळ-चिपळ्या आणि खांद्यावर झोळी अशा वेशातले वासुदेव संमेलनाच्या निमित्ताने शहरात फिरताना दिसत आहेत. पूर्वी वासुदेव भल्या पहाटे भजन, अभंग म्हणत नागरिकांमध्ये प्रबोधन करायचे. मात्र, आताच्या काळात ही कला लुप्त होते आहे. आजच्या पिढीतील अनेकांना वासुदेव कोण हेही माहिती नसते. काळाच्या ओघात कमी होत जाणारे वासुदेव पिंपरी-चिंचवडमध्ये लोककला संमेलनामुळे महाराष्ट्रभरातून दाखल होत आहेत.
सकाळी सहा वाजल्यापासून पिंपरी, चिंचवड, आकुर्डी, भोसरी, प्राधिकरण अशा विविध भागांत वासुदेव नागरिकांना 'आवताण' देत असून लोककला संमेलनाची माहितीदेखील देत आहेत. स्वरचित रचनांमधून वासुदेव प्रबोधन करत आहेत. सहसा न दिसणाऱ्या या लोककलावंतांमुळे नागरिकही त्यांची विचारपूस करून संवाद साधत आहेत. पूर्वीच्या काळात दळणवळणाचे साधन नसताना वासुदेव प्रबोधन करत होते. मात्र, तंत्रज्ञानाच्या युगातही वासुदेवांकरवी आवताण दिल्याने नागरिकांमध्ये आनंदाचे वातावरण आहे.
.
आम्ही आमच्या गावालाच असतो. गावातील लोकांना आमच्या कलेबाबत माहिती आहे. मात्र, शहरात असे चित्र नाही. शहरातील नागरिक अनोळखी नजरेने पाहतात. आमच्या पेहराव आणि कलेबाबत माहिती घेतात. आपुलकीने आमची विचारपुस करतात. त्यांच्याशी संवाद साधण्यात आम्हालाही आनंद आहे. लोककला संमेलनामुळे आमच्यासारख्या कलावंतांचा सन्मान होतो आहे.
- बाबासाहेब सातपुते, वासुदेव