टोळक्याकडून वाहनांची तोडफोड

म. टा. प्रतिनिधी, हडपसर
‘मी इथला भाई आहे,’ असे म्हणत आपल्याच परिसरात आठ जणांच्या टोळक्याने वाहनांची तोडफोड करून दहशत माजवण्याचा घटना हांडेवाडी रोड इंदिरानगर येथे बुधवारी सायंकाळी घडली. यामध्ये पार्क केलेल्या तीन स्कूल बससह सहा वाहनांची तोडफोड व अॅक्सिस बँकेच्या एटीएमच्या काचा फोडण्यात आल्या. रस्त्यावरील भाजी विक्रेत्याची हातगाडी उलटवून भाजीपाल्याचे नुकसान करून हे टोळके फरारी झाले.
याबाबत कोंढवा पोलिस ठाण्यात आठ आरोपींविरोधात गुन्हा दाखल करण्यात आला आहे. यातील तिघांना पोलिसांनी अटक केली आहे. त्यांना न्यायालयाने दोन दिवसांची पोलिस कोठडी सुनावली आहे. याबाबत कोंढवा पोलिस मुख्य आरोपीसह अन्य चार जणांचा शोध घेत आहे. कायदा व सुव्यवस्था चोख ठेवण्याच्या दृष्टिकोनातून बुधवारी सायंकाळपासून या ठिकाणी मोठा पोलिस बंदोबस्त ठेवण्यात आला आहे. पोलिसांनी इम्रान इर्शाद जमादार (वय २८, रा. इंदिरानगर, हांडेवाडी रोड), शरद रावसाहेब अहिरे (वय ३०, रा. धनकुटे वस्ती, बाणेर), फिरोज दिलावर पठाण (वय ३०, रा. लोणी काळभोर) या तिघांना अटक केली आहे. या घटनेतील मुख्य आरोपी राज शेख व अन्य चार साथीदार फरारी झाले आहेत.
कोंढवा पोलिस ठाण्याचे वरिष्ठ पोलीस निरीक्षक मिलिंद गायकवाड यांनी दिलेल्या माहितीनुसार, बुधवारी सायंकाळी हांडेवाडी रोड येथे काही तरुण अचानक हातामध्ये रॉड घेऊन आले. रस्त्याच्या मोकळ्या जागेवर पार्क केलेल्या तीन स्कूलबस, एक मारुती व इंडिका कार आणि एका रिक्षाच्या काचा त्यांनी फोडल्या. यानंतर रस्त्याच्या कडेला एका भाजी विक्रेत्याची हातगाडी उलटी करून, त्यांनी भाजीपाल्याचे नुकसान केले. तिथून पुढे गेल्यानंतर त्यांनी अॅक्सिस बँकेचे एटीएमच्या काचा फोडल्या. त्यामुळे परिसरात भीतीचे वातावरण पसरले होते. नागरिकांनी पोलिसांना कळविल्यानंतर हे युवक फरारी झाले. पोलिसांनी तत्काळ आरोपींचा शोध घेतला आणि यातील तिघांना ताब्यात घेतले. अन्य मुख्य आरोपी राज शेखसह चौघांचा तपास पोलिस करीत आहेत.