खऱ्या-खोट्या बातम्यांची विश्वासार्हता महत्वाची; 'टाइम्स व्हेरिफाइड' करणार शहानिशा

पुणे : खऱ्या आणि खोट्यांचे मिश्रण करुन अनेक बातम्या आणि गोष्टी विविध प्रकारच्या माध्यमांतून आपल्यापर्यंत पोहोचत असतात. त्या खऱ्या आहेत, खोट्या आहेत की अर्धवट खऱ्या आहेत हे समजणे अनेकदा अवघड होते. 'महाराष्ट्र टाइम्स'मध्ये अशा बातम्यांची शहानिशा आता दररोज 'टाइम्स व्हेरिफाइड' द्वारे केली जाणार आहे. मनात शंका निर्माण करणाऱ्या बातम्यांबद्दलचा भ्रम दूर करणारे हे दैनंदिन सदर बुधवार २ नोव्हेंबरपासून सुरु होत आहे.

माहिती तंत्रज्ञानावर आधारित समाजमाध्यमांमुळे सध्या माहितीचे पेव फुटले आहे. स्मार्टफोनवर अत्यल्प किमतीत अमर्यादित इंटरनेट उपलब्ध असल्याने माहितीची देवाणघेवाण होण्याचा वेग प्रचंड वाढला आहे. एखादी घटना घडली की क्षणार्धात त्याविषयीच्या माहितीचा महापूर सोशल मीडियावरून वाहू लागतो. त्यात अनेक उलटसुलट गोष्टींचा समावेश असतो. त्यामुळे ही माहिती, बातमी खरी की खोटी याबाबत सर्वसामान्य नागरिकांच्या मनात संभ्रम निर्माण होतो. हा संभ्रम दूर करण्यासाठी 'टाइम्स व्हेरिफाइड' हे सदर सुरु करण्यात येत आहे.

गोलंदाजांची बेदम धुलाई; फक्त ३५ चेंडूत शतक आणि त्यानंतर पाहा काय झालं
सोशल मीडियावरून येणाऱ्या एखाद्या अशा संदेशाची सत्य-असत्यता पडताळण्यासाठी आपण फक्त 'टाइम्स व्हेरिफाइड'चा ९८१९८८८८८७ हा क्रमांक मोबाइलवर सेव्ह करा. शंका किंवा त्याबद्दल खरे-खोटे जाणून घेण्यासाठी संबंधित संदेश व्हॉट्स-अॅपद्वारे या क्रमांकावर पाठवा. 'टाइम्स व्हेरिफाइड' अंतर्गत 'महाराष्ट्र टाइम्स' आपल्या समितीच्या माध्यमातून त्याची पडताळणी, खातरजमा करेल आणि 'टाइम्स व्हेरिफाइड' या सदराद्वारे नेमकी व अचूक बातमी तुमच्यापर्यंत पोहोचवेल. समाजामध्ये कोणत्याही प्रकारची चुकीची माहिती आणि गैरसमजुती पसरू नये, यासाठी 'महाराष्ट्र टाइम्स'ने पुढाकार घेतला असून, त्यासाठीच हा उपक्रम राबवला जाणार आहे.

संदेशांची विश्वासार्हता महत्त्वाची

एखादा फॉरवर्डेड मेसेज तुम्हालाही आला असेल, आणि त्याबाबत तुमच्या मनात शंका असेल तर जरा थांबा. 'टाइम्स व्हेरिफाइड'ला संबंधित संदेश पाठवून तो विश्वासार्ह आहे ना, याची खात्री करा आणि मगच पुढची पावले उचला; अन्यथा तुमच्या संबंधित मित्र-नातेवाइकांना हा संदेश चुकीचा आणि दिशाभूल करणारा आहे, हे देखील अगदी विश्वासाने सांगा.