लोकांच्या मदतीने डॉल्बी जमीनदोस्त

नांगरे पाटलांनी उलगडली डॉल्बीमुक्तीची गाथा

म. टा. प्रतिनिधी, पुणे

‘मी स्वतः गणपतीचा भक्त आहे. पण अधिकार आणि विवेक यांचा एकत्र उपयोग करण्याचे मला भानही आहे. नागरिकांच्या आरोग्यासाठी हानीकारक असणाऱ्या डॉल्बीच्या भिंती यंदाच्या गणेशोत्सवात रस्त्यांवर येऊच द्यायच्या नाहीत, हे मी ठरवले होते. मला या आव्हानात लोकांनी साथ दिली. याचाच परिणाम म्हणून माझ्या कार्यक्षेत्रात तीस हजार मंडळांना डॉल्बी वाजवू दिला नाही, ’ या शब्दांत कोल्हापूर परिक्षेत्राचे विशेष पोलिस महानिरीक्षक विश्वास नांगरे पाटील यांनी डॉल्बी बंदीचे समर्थना केले.
‘अक्षरधारा’ आयोजित दीपावली शब्दोत्सवाचे उद‍्घाटन सोमवारी नांगरे पाटील यांच्या हस्ते झाले. या वेळी महापौर मुक्ता टिळक, महाराष्ट्र साहित्य परिषदेचे कार्याध्यक्ष प्रा. मिलिंद जोशी, डॉ. कल्याणी मांडके, डॉ. सदानंद बोरसे आदी उपस्थित होते. अभिनेते-निवेदक राहुल सोलापूरकर यांनी नांगरे पाटील यांची मुलाखत घेतली.
नांगरे पाटील म्हणाले, ‘एरवी तासनतास लांबणारी मिरवणूक यंदा बारा तास लवकर संपली. उत्सव हा उत्सवासारखा साजरा व्हावा, त्याचा लोकांना त्रास होऊ नये.’ मुलाखतीच्या एका टप्प्यावर आपल्या बालपणीविषयी बोलताना ते म्हणाले, की ‘मला आठवतं- लहानपणी शाळेत असताना मी खूप मस्तीखोर होतो. सतत दंगामस्ती करायचो. पण एकेदिवशी कदमबाईंनी कानाखाली पहिल्यांदा आवाज काढला आणि माझे डोळे खाडकन उघडले. विद्या विनयेन शोभते, ही जाणीव मला त्या वेळी झाली. त्यानंतर मी अभ्यास हेच माझ्या आयुष्याचे ध्येयच ठरवले.’