अधिक मासानिमित्त देशभरातून भाविक
म. टा. वृत्तसेवा, पंढरपूर
तीन वर्षांतून येणाऱ्या अधिक अर्थात पुरुषोत्तम मासामध्ये देशभरातून आलेल्या भाविकांनी विठूरायाच्या चरणी दोन कोटी तीस लाख रुपयांचे भरभरून दान अर्पण केले आहे. या शिवाय जवळपास ७ लाख रुपयांच्या सोन्या-चांदीच्या वस्तूदेखील देवाच्या तिजोरीत जमा झाल्या आहेत.
हिंदू धर्मात आणि वारकरी संप्रदायात या अधिक महिन्याला विशेष महत्त्व असल्याने देशभरातील भाविक गेल्या महिनाभरात पंढरपूरमध्ये दर्शनासाठी येऊन गेले. अजूनही देवाला आलेल्या दानाची मोजणी सुरूच असून, यावेळी आलेला अधिक महिना मे महिन्याच्या सुट्यांना जोडून आल्याने देवाच्या उत्पन्नात देखील घसघशीत वाढ झाली आहे. या अधिक महिन्यात रोज सरासरी एक लाखापेक्षा जास्त भाविक आणि पर्यटक पंढरपूरमध्ये येत असल्याने महिनाभरात जवळपास १५ लाख भाविकांना देवाच्या पायावर आणि मुखदर्शनाचा लाभ घेता आला. बुधवारी अमावस्येनंतर अधिक महिन्याची समाप्ती झाल्यावर भाविकांकडून देवाच्या पायावर अर्पण केलेली दक्षिण आणि सोन्या चांदीच्या वस्तूंची मोजणी व नोंदणी गुरुवारी पूर्ण करण्यात आली. महिनाभर दर्शन देऊन थकलेल्या विठूरायाला गुरुवारी पुरणपोळी, बेसन लाडू, साखरभात, आमरसासह पंचपक्वान्नांचा महानैवेद्य दाखविण्यात आला. मंदिर समितीचे कार्यकारी अधिकारी सचिन ढोले यांच्या हस्ते सपत्नीक शेवटची चंदन उटी पूजा होणार असून, हवामानातील उष्मा कमी झाल्याने गेल्या काही दिवसांपासून सुरु असलेली चंदन उटी पूजा आजपासून (शुक्रवार) बंद करण्यात येणार आहे.