म. टा. प्रतिनिधी, पुणे
जिल्हा प्रशासनाने गेल्या महिनाभरात राबविलेल्या युवा मतदार नोंदणी मोहिमेअंतर्गत ५४ हजार २४१ जणांनी अर्ज सादर केले असून, या मोहिमेला ३१ ऑगस्टपर्यंत मुदतवाढ देण्यात आली. या मोहिमेनुसार आता १२ ऑगस्ट रोजी सर्व मतदान केंद्र आणि कॉलेजांमध्ये विशेष मतदार नोंदणी मोहीम होणार आहे.
निवडणूक आयोगाच्या आदेशानुसार एक जुलै ते ३१ जुलै या कालावधीत मतदार नोंदणी मोहीम राबविली गेली. या मोहिमेला ३१ ऑगस्टपर्यंत मुदतवाढ देण्याचा आदेश राज्याच्या मुख्य निवडणूक अधिकाऱ्यांनी एक ऑगस्ट रोजी दिला आहे.
याबाबत उपजिल्हा निवडणूक अधिकारी मोनिका सिंह म्हणाल्या, ‘या मोहिमेनुसार १२ ऑगस्ट रोजी विशेष मोहीम राबविली जाणार आहे. त्यासाठी शहर आणि जिल्ह्यातील सर्व मतदान केंद्र आणि महाविद्यालयांमध्ये अर्ज स्वीकारले जाणार आहेत. १८ ते २१ या वयोगटातील मतदारांसाठी ही मोहीम घेण्यात येत असून, त्यासाठी नवमतदारांकडून ‘अर्ज ६’ भरून घेतला जात आहे. हे अर्ज संबंधितांनी कॉलेज, मतदार नोंदणी अधिकारी किंवा सहायक मतदार नोंदणी अधिकारी यांच्या कार्यालयात जमा करावेत.’
शहर आणि जिल्ह्यात २३ मतदारसंघांमध्ये मतदार नोंदणी करण्याची व्यवस्था करण्यात आली आहे. त्यामध्ये आंबेगाव, जुन्नर, खेड-आळंदी, शिरूर, दौंड, इंदापूर, बारामती, पुरंदर, भोर, वेल्हा, मुळशी, मावळ, चिंचवड, पिंपरी, भोसरी, वडगाव शेरी, शिवाजीनगर, कोथरूड, खडकवासला, कसबा पेठ, पर्वती, हडपसर आणि पुणे कँटोन्मेंट यांचा समावेश आहे. याशिवाय कॉलेजांमध्ये अर्ज स्वीकारण्यात येणार आहेत.’ असे सिंह यांनी स्पष्ट केले.