म. टा. प्रतिनिधी, पुणे
गांजा ओढण्याच्या कारणावरून सराईत गुन्हेगारावर पाच ते सहा जणांनी कोयत्याने वार करून जीवे मारण्याचा प्रयत्न केल्याचा प्रकार पूना क्लबजवळ रविवारी रात्री घडला. या प्रकरणी पाच ते सहा जणांवर खुनाच्या प्रयत्नाचा गुन्हा दाखल करण्यात आला आहे.
मोमीन शेख (वय २४, रा. ताडीवाला रोड) असे जखमी झालेल्या व्यक्तीचे नाव आहे. त्याने दिलेल्या तक्रारीवरून मेरो, विशाल आणि त्यांच्या चार साथीदारांवर खुनाच्या प्रयत्नाचा गुन्हा दाखल करण्यात आला आहे. पोलिसांनी दिलेल्या माहितीनुसार, मोमीन रेकॉर्डवरील गुन्हेगार आहे. त्याला दोन वर्षांपूर्वी तडीपार करण्यात आले होते. यातील काही आरोपीही पोलिस रेकॉर्डवरील आहेत. दोन दिवसांपूर्वी मोमीन शेख बंडगार्डन परिसरातील पडीक बंगल्यात गांजा ओढण्यासाठी गेला होता. या वेळी त्याला आरोपींनी आमच्या भागात येऊन गांजा ओढू नको, असे सांगितले. या वेळी त्यांच्यात वाद झाला. मोमीन कपडे खरेदी करण्यासाठी सोमवारी रात्री मित्रासोबत जंगली महाराज रस्त्यावर आला होता. कपडे खरेदी करून परत येत असताना त्याला पूना क्लबच्या समोर आरोपींनी अडविले. गांजा ओढण्यास मनाई करूनही तू इकडे का आलास म्हणून मारहाण करण्यास सुरुवात केली. हॉकीस्टीकने मारहाण केल्यानंतर एकाने त्याच्या डोक्यात कोयत्याने वार केले. त्याचा मित्र अनिकेत यालाही मारहाण करण्यात आली आहे. मोमीनने गेल्या दीड ते दोन वर्षांपासून गुन्हेगारी थांबवल्याचे पोलिसांकडून सांगण्यात आले. अद्याप आरोपींना अटक करण्यात आलेली नाही. या प्रकरणी उपनिरीक्षक ए. आय. पठाण तपास करत आहेत.