म. टा. प्रतिनिधी, पुणे
मेरिटाइम रिसर्च सेंटर, तलेरा इन्स्टिट्यूट ऑफ फाइन आर्ट्स आणि राष्ट्रीय चित्रपट संग्रहालय यांच्या वतीने नीर ध्वनी महोत्सव आयोजिण्यात येणार आहे. चित्रपट संग्रहालय येथे झालेल्या एका कार्यक्रमात महोत्सवाची घोषणा करण्यात आली. २४ व २५ नोव्हेंबर रोजी चित्रपट संग्रहालयात हा महोत्सव होणार आहे.
मेरिटाइम रिसर्च सेंटरचे संचालक डॉ. अर्नब दास, सल्लागार प्रफुल तलेरा, प्रभात स्टुडिओचे विवेक दामले, इवॉल्विंग कल्चर फाउंडेशनच्या संचालिका त्रिशला तलेरा उपस्थित होते. स्वतंत्र थिएटर यांच्या वतीने 'जल है, तो कल है' या पथनाट्याचे आयोजन कारण्यात आले होते. महोत्सवात ध्वनिविज्ञानाशी संबंधित विषयांवर आधारित कार्यक्रम होणार आहेत. भूगर्भातील पाण्याशी संबंधित अनेक बाबींवर या दरम्यान प्रकाश टाकला जाणार आहे. महोत्सवाच्या निमित्ताने पाण्यासारख्या नैसर्गिक स्रोताचे व्यवस्थापन आणि संवर्धन करण्याविषयी नागरिकांत जागरुकता निर्माण होईल. याबरोबरच पाण्याखालील जीवनसृष्टीबद्दलही नागरिकांत जागरुकता निर्माण होईल. ही जागरुकता मुख्यत: चित्रपट आणि संवादात्मक सत्राच्या माध्यमातून होईल, असे संग्रहालयाचे प्रकाश मगदूम यांनी सांगितले.
पाणी साक्षरता या विषयाशी संबंधित धोरणे नागरिकांसमोर आणणे हा या महोत्सवाचा हेतू आहे. यात लघुपट व त्या विषयावर आधारित चर्चा असे सत्रांचे स्वरूप आहे, अशी माहिती प्रफुल तलेरा यांनी दिली. महोत्सवात व्याख्याने व चर्चासत्रांबरोबर जल साक्षरतेचा संदेश देणाऱ्या प्रतिकृती, चित्राकृती मांडण्यात येणार आहेत.